بھارتی اداکار نواز الدین صدیقی نے اپنی سابق اہلیہ کی جانب سے عائد کیے گئے الزامات کی تردید کرتے ہوئے کہا ہے کہ اپنی ویڈیو میں عالیہ نے جو گھر دکھایا ہے، وہ ان کا نہیں بلکہ ان کی والدہ مہرالنسا صدیقی کا ہے۔
انسٹا گرام پر اپنی ایک ویڈیو پوسٹ میں عالیہ صدیقی نے اپنے سابق شوہر نواز الدین صدیقی پر انہیں بچوں سمیت گھر سے بے دخل کرنے کا الزام عائد کرتے ہوئے بتایا تھا کہ انہیں اپنے بچوں کے ہمراہ ایک رشتہ دار کے گھر قیام کرنا پڑا تھا۔
بھارتی میڈیا رپورٹس کے مطابق نواز الدین کا موقف ہے کہ وہ پہلے ہی متعلقہ گھر اپنی والدہ مہرالنسا کے نام کر چکے ہیں۔ اس لیے اب انہیں یہ فیصلہ کرنے کا اختیار نہیں کہ اس گھر میں کون داخل ہو سکتا ہے اور کون نہیں۔
گھر سے سابق اہلیہ کی بے دخلی کے الزام پر ردعمل ظاہر کرتے ہوئے نواز الدین کا کہنا تھا کہ انہوں نے 2016میں ممبئی میں عالیہ کو ایک فلیٹ خرید کر دیا تھا جسے عالیہ نے اپنی مرضی سے کرائے پر دے دیا تھا۔
نواز الدین صدیقی کے مطابق عالیہ کا یہ دعوٰی کہ ان کے پاس رہنے کے لئے کوئی اور جگہ نہیں تکنیکی طور پر غلط ہے۔
نواز الدین نے اپنی سابق اہلیہ کے ویڈیو بیان پر تنقید کرتے ہوئے کہا کہ ویڈیو میں جس گھر کو وہ دکھا رہی ہیں وہ ان کا نہیں بلکہ ان کی والدہ مہرالنسا صدیقی کا ہے۔ لہذا کسی نے بھی عالیہ کو اور ان کے بچوں کو گھر سے بے دخل نہیں کیا۔
واضح رہے کہ گزشتہ ماہ ممبئی ہائی کورٹ نے نواز الدین اور ان کی اہلیہ کو علیحدگی کے بعد اپنے بچوں کے معاملے کو خوش اسلوبی سے حل کرنے کا مشورہ دیا تھا۔
