نئی دہلی میں پاکستانی ہائی کمیشن نے 19 سے 25 دسمبر 2023 تک پنجاب کے ضلع چکوال میں واقع شری کٹاس راج مندر، جسے قلعہ کٹاس کے نام سے بھی جانا جاتا ہے، کی زیارت کے لیے بھارتی ہندو یاتریوں کے ایک گروپ کو 62 ویزے جاری کر دیے ہیں۔
بھارت میں پاکستانی ہائی کمیشن کی جانب سے جاری بیان میں چارج ڈی افیئرز اعزاز خان نے ہندو یاتروں کے محفوظ سفر اور پاکستان میں قیام کو یادگار بنانے کے لیے نیک خواہشات کا اظہار کیا ہے۔
1974 کے مذہبی مقامات کے دورے سے متعلق پاک بھارت پروٹوکول کے تحت ہر سال بھارت سے ہزاروں سکھ اور ہندو یاتری مختلف مذہبی تہواروں اور تقریبات میں شرکت کے لیے پاکستان آتے ہیں۔
بیان میں کہا گیا ہے کہ کو ہندو یاتریوں کو ویزوں کا اجراء حکومت پاکستان کی مذہبی مقامات کی زیارت کو آسان بنانے اور بین المذاہب ہم آہنگی کو فروغ دینے کی کوششوں کے عین مطابق ہے۔
