سندھ کے بڑے مزار سے کروڑوں روپے کا سونا کس نے چوری کیا؟

اور اب صوبہ سندھ کی درگاہیں بھی غیر محفوظ ہیں۔ درگاہ سیہون شریف حضرت لعل شہباز قلندر سے ایک کروڑ روپے سے زائد کا سونا چوری ہوگیا۔ نگران وزیر اوقاف عمر سومرو کے حکم پر منیجر کو معطل کرکے مقدمہ درج کرلیا گیا ہے۔

ترجمان وزیر اوقاف کے مطابق درگاہ لعل شہباز قلندر سے ایک ماہ میں 1 کروڑ 23 لاکھ 72 ہزار 863 روپے کا سونا چوری ہوا ہے۔ انکوائری کمیٹی کے سامنے منیجر زبیر بلوچ نے اپنی چوری کا جرم قبول کیا ہے۔

وزیر اوقاف عمر سومرو کے مطابق مینیجر زبیر بلوچ کو معطل کرکے مقدمہ درج کرنے کے ساتھ کیس اینٹی کرپشن کو بھیجنے کا حکم دیا ہے۔ لعل شہباز قلندر کے منیجر کی تنخواہ اور پینشن روکنے کے احکامات دے دیے ہیں۔ اینٹی کرپشن کو لکھ دیا ہے کہ منیجر زبیر بلوچ سے سونا فوری ریکور کیا جائے۔ اس کے ساتھ ساتھ تمام درگاہوں کے منیجرز کے خلاف بھی تحقیقات ہوں گی۔

وزیر اوقاف عمر سومرو کے احکامات کے بعد درگاہ سیہون شریف کے مینیجر زبیر بلوچ کے معطلی، تنخواہ اور پینشن روکنے کا نوٹیفکیشن جاری کردیا گیا ہے۔ درگاہ حضرت لعل شہبار قلندر سے زبیر بلوچ نے علی رضا گوپانگ سے مل کر سونا اور چاندی چوری کیا تھا۔