شارجہ کی حکومت نے اہل غزہ سے یکجہتی کا اظہار کرتے ہوئے سال نو کی تقریبات پر پابندی عائد کردی ہے۔
شارجہ پولیس کے اعلان کے مطابق اس بار نئے سال کے استقبال کے لیے آتش بازی کی تقریبات منعقد نہیں کی جائیں گی۔
اس ضمن میں پولیس نے تمام اداروں اور شہریوں سے تعاون کی اپیل کی ہے اور ساتھ ہی خبردار کیا ہے کہ احکامات کی خلاف ورزی کرنے والوں کے خلاف قانونی کارروائی کی جائے گی۔
مزید پڑھیں
واضح رہے کہ غزہ میں اسرائیلی فوج کے وحشیانہ حملوں میں 7 اکتوبر سے اب تک 21 ہزار کے قریب افراد شہید ہوچکے ہیں جن میں 70 فیصد بچے اور خواتین شامل ہیں۔
اسرائیلی آرمی چیف نے کہا ہے کہ حماس کے ساتھ جنگ کئی ماہ تک جاری رہ سکتی ہے۔ اسرائیل کی جانب سے حماس کے خاتمے تک حملے جاری رکھنے کے اعلان کے بعد غزہ میں مزید کئی ہزار اموات کا خدشہ ظاہر کیا جارہا ہے۔
اسرائیلی وحشیانہ بمباری اور زمینی آپریشنز کے نتیجے میں غزہ کی 24 لاکھ آبادی کو پانی، خوراک، دواؤں اور بجلی کی شدید قلت کا سامنا ہے۔
غزہ میں محدود پیمانے پر امدادی سامان فراہم کیا جارہا ہے۔ اقوام متحدہ کے مطابق غزہ پر اسرائیلی حملوں کے باعث 19 لاکھ شہری بے گھر ہوچکے ہیں۔
