اسرائیل کا لبنان میں ڈرون حملہ، حماس رہنما صالح العاروری شہید

اسرائیلی فوج نے لبنان کے دارالحکومت بیروت میں فلسطین کی مزاحمتی تنظیم حماس کے دفتر کو ڈرون کے ذریعے نشانہ بنایا ہے جس سے تنظیم کے سینیئر رہنما صالح العاروری شہید ہو گئے ہیں۔

غیرملکی میڈیا رپورٹس کے مطابق صالح العاروری حماس پولٹ بیورو کے نائب سربراہ تھے۔

حماس نے صالح العاروری کی شہادت کی تصدیق کرتے ہوئے کہا ہے کہ وہ اپنے 2 فوجی کمانڈرز کے ساتھ مارے گئے ہیں۔

اسرائیلی میڈیا دعویٰ کر رہا ہے کہ حماس رہنما صالح العاروری کی حزب اللہ کے سربراہ حسن نصراللہ سے ملاقات ہونے والی تھی۔

واضح رہے کہ اسرائیل اور حماس کے درمیان جنگ کے آغاز سے ہی حزب اللہ اور اسرائیلی فوج کے درمیان لبنان کی جنوبی سرحد پر جھڑپیں ہو رہی ہیں۔

اسرائیلی فوج کی غزہ پر بمباری جاری

دوسری جانب اسرائیلی فوج کی جانب سے غزہ پر بمباری کا سلسلہ جاری ہے، اور 24 گھنٹوں کے دوران 200 سے زیادہ فلسطینی شہید ہو گئے ہیں۔

اسرائیل کو غزہ میں سخت مزاحمت کا سامنا کرنا پڑ رہا ہے۔ مزاحمت کاروں نے 4 روز میں 70 سے زیادہ اسرائیلی ٹینکوں اور فوجی گاڑیوں کو تباہ کیا ہے۔ جبکہ متعدد فوجی بھی ہلاک ہوئے ہیں۔

7 اکتوبر سے شروع ہونے والی لڑائی میں اب تک 22 ہزار سے زیادہ فلسطینی شہید ہو چکے ہیں۔