عوامی مسلم لیگ کے سربراہ شیخ رشید احمد کو 9 مئی کے مقدمے میں ضمانت خارج ہونے پر راولپنڈی کی عدالت سے گرفتار کر لیا گیا ہے۔
عوامی مسلم لیگ کے سربراہ شیخ رشید کو تھانہ نیوٹاؤن کی پولیس نے احاطہ عدالت سے گرفتار کیا۔
شیخ رشید کے خلاف تھانہ نیو ٹاؤن میں میٹروبس اسٹیشن سکتھ روڈ پر توڑ پھوڑ کا مقدمہ درج ہے۔
Related Posts
راولپنڈی کی انسداد دہشتگردی عدالت نے اس سے قبل 11 مقدمات میں شیخ رشید کی ضمانت منظور کی، ایک مقدمے میں ضمانت خارج ہونے پر انہیں گرفتار کر لیا گیا ہے۔ سربراہ مسلم لیگ کی کل 14 میں سے 13 مقدمات میں ضمانت ہو چکی ہے۔
واضح رہے کہ اس سے قبل شیخ رشید ایک ماہ سے زیادہ عرصہ تک گرفتار رہنے کے بعد اچانک رہا کر دیے گئے تھے۔ انہوں نے اپنی رہائی کے وقت ایک نجی ٹی وی چینل کو انٹرویو بھی دیا تھا۔
شیخ رشید نے اپنے انٹرویو میں کہا تھا کہ میں چلے پر گیا ہوا تھا۔ 9 مئی کے واقعات کی مذمت کرتا ہوں۔
شیخ رشید اپنی رہائی کے بعد وقتاً فوقتاً میڈیا سے گفتگو کرتے رہے، انہوں نے توقع ظاہر کی تھی کہ عام انتخابات میں پی ٹی آئی ان کے مقابلے میں امیدوار نہیں لائے گی مگر اب تحریک انصاف نے ان کے مقابلے میں امیدوار کھڑے کر دیے ہیں۔
سربراہ عوامی مسلم لیگ نے پی ٹی آئی کی جانب سے اپنے خلاف امیدوار کھڑے کرنے پر شکوے کا اظہار بھی کیا ہے۔ اور کہا ہے کہ راولپنڈی کے دونوں حلقوں سے کامیابی حاصل کروں گا۔
