عوامی مسلم لیگ کے سربراہ شیخ رشید احمد نے 9 مئی جلاؤ گھیراؤ کے واقعات سے لاتعلقی کا اعلان کرتے ہوئے کہا ہےکہ وہ 8 مئی سے 16 مئی تک یہاں نہیں تھے۔
راولپنڈی کی انسداد دہشت گردی عدالت کے جج ملک اعجاز نے شیخ رشید احمد اور شیخ راشد شفیق کے خلاف 9 مئی کے مقدمات کی سماعت کی، شیخ رشید اپنے وکیل کے ہمراہ عدالت میں پیش ہوئے۔ دوران سماعت عدالت نے شیخ رشید کے کیسز کا مکمل ریکارڈ پیش نہ کرنے پر برہمی کا اظہار کیا جس پر سرکاری پراسیکیوٹر نے کہا کہ مزید موقع دیا جائے۔
مزید پڑھیں
عدالت نے آئندہ تاریخ تک تفتیش مکمل کرکے ریکارڈ پیش کرنے کا حکم دیتے ہوئے شیخ رشید احمد او راشد شفیق کی عبوری ضمانتوں میں 4 جنوری تک توسیع کردی۔
عدالت کے باہر میڈیا سے گفتگو میں شیخ رشید احمد نے کہا کہ اداروں کا ہمیشہ احترام کیا ہے اور 9 مئی کے مقدمات سے میرا کوئی تعلق نہیں، میں 8 مئی سے 16 مئی تک یہاں نہیں تھا۔
انہوں نے کہا کہ اللہ بہتر کرے گا، زندہ رہا تو الیکشن ضرور لڑوں گا، این اے 56 اور 57 سے ’قلم دوات‘ کے انتخابی نشان پر الیکشن لڑوں گا۔
