انتخابی نتائج کا سلسلہ جاری ہے، رات گئے تک آزاد امیدوار پنجاب اور خیبر پختوانخو میں مختلف پولنگ اسٹیشن سے موصولہ غیر حتمی نتائج کے مطابق سبقت لیے ہوئے تھے لیکن صبح ہوتے ہی جو نتائج آنا شروع ہوئے وہ مختلف کہانی بتارہے تھے، اس وقت ن لیگ کے کیمپ میں کچھ خوشی کے آثار نمودار ہوئے جس کی بنا پر اب ن لیگی رہنماؤں نے یہ کہنا شروع کردیا کہ نواز شریف واپس نہیں جائیں گے بلکہ وزیر اعظم کی شیروانی پہنیں گے۔
مزید پڑھیں
اپنے ایک بیان میں لیگی رہنما سینیٹر اسحاق ڈار نے دعوٰی کیا ہے کہ آزاد امیدوار رابطے میں ہیں، آئندہ بہتر گھنٹے بہت اہم ہیں، مریم نواز اور مریم اورنگزیب نے بھی ٹوئیٹ کیا کہ نواز شریف حمتی رزلٹ آنے کے بعد وکٹری اسپیچ کریں گے، لیکن اس وقت الیکشن کمیشن کے رزلٹ کے مطابق قومی اسمبلی کی پاکستان تحریک انصاف کے حمایت یافتہ آزاد امیدوار 66 نشستوں پر کامیاب ہوگئے ہیں ن لیگ ابھی تک 46 اور پیپلزپارٹی 32 نشستوں پر کامیاب ہوئی ہیں۔
نواز شریف نے لندن واپسی کا کوئی فیصلہ نہیں کیا؟
وی نیوز سے گفتگو کرتے ہوئے مسلم لیگ ن کے ایک سینئر رہنما نے بتایا کہ اگر ن لیگ حکومت نہ بنا سکی تو ہم اپوزیشن میں بیٹھیں گے اور نواز شریف پاکستان میں ہی رہیں گے، ان کا ابھی لندن جانے کا کوئی پلان نہیں ہے، ہاں البتہ میڈیکل چیک اپ کے لیے جانا ہوا تو وہ کچھ روز کے لیے ہوگا۔
’اب میاں نواز شریف پاکستان میں ہی رہیں گے لیکن اب جو رزلٹ سامنے آرہے ہیں اس میں ن لیگ مختلف جگہوں سے جیت رہی ہے، ہمیں امید ہے کہ ن لیگ پنجاب سے 90 کے قریب نشستیں لینے میں کامیاب ہو جائے گی اور وفاق میں ایک مخلوط حکومت بنتی ہوئی نظر آرہی ہے۔‘
لیگی رہنما کے مطابق پنجاب مین صورتحال مختلف ہے یہاں پر صوبائی نشستوں پر ن لیگ جیت رہی ہے اور ن لیگ ہی صوبے میں حکومت بنائے گی تاہم وزیر اعلیٰ پنجاب کون ہوگا اس کا ابھی پارٹی نے فیصلہ نہیں کیا ہے۔
