پاکستان مسلم لیگ ن کی چیف آرگنائزر مریم نواز نے ملک کے سب سے بڑے صوبے پنجاب کی وزارت اعلیٰ کا حلف اٹھا لیا ہے۔
وزیراعلیٰ کے انتخاب کے بعد اب اس پر چہ مگوئیاں جاری ہیں کہ کابینہ کب بنے گی اور کابینہ میں کون کون شامل ہوگا۔
پنجاب کی کابینہ کے حوالے سے مسلم لیگ ن کے قائد نواز شریف پارٹی کے لوگوں سے ملاقاتیں کرکے وزرا کی حمتی لسٹ تیار کر رہے ہیں۔ کِس کو کون کا محکمہ ملنا چاہیے اس پر حتمی مشاورت ہو رہی ہے۔
مزید پڑھیں
مسلم لیگ ن کے ذرائع کے مطابق آج بھی جاتی عمرا میں اسپیکر پنجاب اسمبلی ملک محمد احمد خان کے ساتھ پنجاب کی کابینہ کے حوالے سے مشاورت کی گئی۔
ذرائع کا دعویٰ ہے کہ اب تک کابینہ میں متوقع شامل ہونے والے 16 افراد کے ناموں پر مشاورت کی گئی ہے۔ متوقع کابینہ میں مسلم لیگ ق اور استحکام پاکستان پارٹی سے ایک ایک وزیر بنانے کا فیصلہ کیا گیا ہے۔
ذرائع کے مطابق مریم نواز کی کابینہ میں ن لیگ کی سینیئر رہنما مریم اورنگزیب، عظمیٰ بخاری، خواجہ سلمان رفیق، میاں مجتبیٰ شجاع الرحمٰن، بلال یاسین اور خواجہ عمران نذیر شامل ہوں گے۔
اس کے علاوہ خضر حیات مزاری، شیر علی گورچانی، احمد خان لغاری، راحیلہ خادم حسین، سبطین رضا بخاری، ایوب خان گادھی، فیصل کھوکھر، میاں یاور زمان کو کابینہ میں شامل کرنے کے لیے مشاورت کی گئی ہے۔
مریم نواز کی متوقع کابینہ میں استحکام پاکستان پارٹی کے رکن ملک غضنفر عباس چھینہ جبکہ مسلم لیگ ق کے رکن چوہدری شافع حسین کا نام بھی شامل ہے۔
کابینہ کے ارکان کب حلف اٹھائیں گے؟
پاکستان مسلم لیگ ن کے ذرائع کے مطابق پہلے مرحلے میں کابینہ کے ارکان کی تعداد 16 یا 20 کے قریب ہوگی جن میں کچھ نام فائنل کر لیے گئے ہیں جبکہ کچھ آج رات تک فائنل ہو جائیں گے۔
ذرائع نے بتایا کہ کل یا پرسوں تک وزرا حلف اٹھا لیں گے، کیونکہ بجٹ کے لیے پنجاب اسمبلی کا اجلاس طلب کر لیا گیا ہے۔ اب چونکہ 29 فروری تک کابینہ کا ہونا لازمی ہے، اس لیے امید ہے کہ آج نام فائنل ہو جائیں گے جس کے بعد کل وزرا حلف اٹھا لیں گے۔
