رانیہ ابو عنزہ کو قدرت نے 10 سال بعد اولاد کی نعمت سے نوازا اور اس کے ہاں جڑواں بچوں کی پیدائش ہوئی لیکن اسرائیلی فوج نے چند لمحوں میں اس کی گود اجاڑ دی۔
مزید پڑھیں
خبر رساں ادارے اے پی کے مطابق، ہفتے کی شب اسرائیلی فوج کی غزہ میں ایک گھر پر بمباری کے نتیجے میں رانیہ کے شوہر، بیٹی وسام اور بیٹا نعیم شہید ہوگئے تھے۔ ابو عنزہ کے گھر پر ہوئے اس حملے میں کل 14 افراد شہید ہوئے جن میں 6 بچے اور 4 خواتین شامل تھیں۔
اس رات رانیہ نے 10 بجے کے قریب اپنے بیٹے نعیم کو دودھ پلایا اور اس کے ساتھ ہی لیٹ گئی۔ اس کی دوسری جانب اس کی بیٹی وسام سو رہی تھی۔ کمرے میں رانیہ کے شوہر بھی موجود تھے اور سو رہے تھے۔ اس کے ایک یا ڈیڑھ گھنٹے بعد بمباری ہوئی اور گھر منہدم ہوگیا۔
گزشتہ روز واقعہ کا ذکر کرتے ہوئے رانیہ نے بتایا، ’جب بمباری ہوئی تو میں نے اپنے بچوں اور شوہر کو پکارا، وہ شہید ہوچکے تھے، بچوں کے والد انہیں اپنے ساتھ لے گئے اور مجھے اکیلا چھوڑ گئے۔‘
رانیہ نے اپنے بچوں کا کمبل اپنے سینے سے لگایا ہوا تھا اور وہ یہ سب روتے ہوئے بتا رہی تھی۔ وسام اور نعیم 13 اکتوبر 2023 کو پیدا ہوئے تھے۔ اس کے شوہر بچوں کی پیدائش پر بہت خوش تھے۔
ان بچوں کی پیدائش حماس اسرائیل جنگ شروع ہونے کے ایک ہفتے بعد ہوئی۔ اسرائیلی فوج اس وقت سے مسلسل غزہ پر بمباری کر رہی ہے۔ یہ حملے عموماً رات کے وقت کیے جاتے ہیں اور گھروں پر حملوں سے قبل انتباہ جاری نہیں کیا جاتا تاکہ لوگ محفوظ مقام پر منتقل ہو سکیں۔
اکتوبر 2023 میں اسرائیل نے رفح کو اپنے لیے محفوظ علاقہ قرار دیا تھا تاہم اب وہاں بھی قابض فوج وحشیانہ بمباری کر کے معصوم فلسطینیوں کا خون بہا رہی ہے۔
غزہ کے محکمہ صحت کے حکام کے مطابق، 7 اکتوبر سے اب تک اسرائیلی جارحیت کے نتیجے میں 30 ہزار سے زیادہ فلسطینی شہید ہو چکے ہیں۔ غزہ شہر ملبے کا ڈھیر بن چکا ہے لاکھوں تعداد میں لوگ نقل مکانی کر چکے ہیں۔
رانیہ کا کہنا تھا، ’ہمارے کوئی حقوق نہیں، میں نے اپنے پیاروں کو کھو دیا، میں اب یہاں مزید نہیں رہنا چاہتی، میں جنگ سے تھک چکی ہوں اور اس ملک سے جانا چاہتی ہوں۔‘ رانیہ اب ایک ہی سوال کرتی ہیں، ’اب مجھے ماں کون کہے گا؟‘
