محکمہ موسمیات نے ملک کے مختلف علاقوں میں 5 مارچ سے 7 مارچ کے دوران بارش اور برفباری کے ایک اور اسپیل کی پیشگوئی کی ہے۔
محکمہ موسمیات کے مطابق آج خیبرپختونخوا کے بالائی علاقوں اور گلگت بلتستان میں بارش اور پہاڑوں پر ہلکی برفباری کا امکان ہے جبکہ کل بروز منگل سے جمعرات تک ملک کے مختلف علاقوں میں بارشوں اور بالائی علاقوں میں برفباری کے ایک اور اسپیل کا امکان ہے۔
مزید پڑھیں
دوسری طرف چلاس اور کوہستان میں شدید بارش کے باعث لینڈ سلائیڈنگ سے سڑکیں بند گئی ہیں، شاہراہ قراقرم کی بحالی کا کام جاری ہے، دیر بالا میں شدید برفباری سے 5 روزہ پولیو مہم ملتوی کر دی گئی ہے۔
خیبرپختونخوا کے علاقے سوات، پارہ چناراور ضلع کرم کے مختلف علاقوں میں وقفے وقفے سے برفباری کا سلسلہ جاری ہے۔
مالم جبہ، کالام، اوشو اور گبرال جانے والے والی سڑکیں بارش اور برفباری کے باعث بند ہو گئی ہیں، مری میں بھی 2 روز سے جاری بارش کے بعد برفباری کا سلسلہ شروع ہو گیا ہے۔
بلوچستان کے علاقے کان مہترزئی پر ایم 50 شاہراہ ٹریفک کے لیے بحال کردی گئی ہے، کوہ سلیمان رینج میں دھاناسر کے مقام پر روڈ کلئیرنس آپریشن مکمل ہونے کے بعد خیبر پختونخوا اور بلوچستان کے درمیان بھی ٹریفک بحال کردی گئی ہے۔
