جنوبی وزیرستان: پاک فوج کے زیر نگرانی 120 ایکڑ پر چلغوزے کے 50 ہزار پودے لگائے جا رہے ہیں

جنوبی وزیرستان میں پاک فوج کے زیر نگرانی شجرکاری مہم کا آغاز کر دیا گیا ہے۔ 120 ایکڑ رقبے پر چلغوزے کے 50 ہزار پودے لگائے جا رہے ہیں۔ زیتون کی پیوند کاری کے ساتھ ساتھ جنگلات کی حفاظت کو بھی یقینی بنایا جا رہا ہے۔

جنوبی وزیرستان کی آب و ہوا اور زمین، جنگلات کی افزائش کے لیے انتہائی موزوں ہے۔ ماہرین جنگلات اور علاقہ مکینوں کی دیرینہ خواہش پر پاک فوج اور محکمہ جنگلات کے باہمی تعاون سے لدھا، کانی گرم، تیارزہ اور مکین میں غیر مفید درختوں کی جگہ 120 ایکڑ رقبے پر چلغوزے کے 50 ہزار پودے لگائے جا رہے ہیں۔

چلغوزے کے ایک ایکڑ جنگل سے سالانہ 10 لاکھ روپے تک کا معاشی فائدہ ہو سکتا ہے۔ اس کے ساتھ زیتون کے جنگلات پر پاک فوج کی جانب سے 70 ہزار درختوں کی مفت پیوند کاری بھی کی جا رہی ہے۔ جنگلات کی حفاظت اور لکڑی کی کٹائی کی روک تھام کے لیے بھی پاک فوج اور محکمہ جنگلات دن رات مصروف عمل ہے۔