ہالی ووڈ اسٹار ول اسمتھ نے حیران کن انکشاف کرتے ہوئے بتایا ہے کہ انہوں نے رمضان کے مہینے میں پورا قرآن پڑھا تھا۔ انہوں نے قرآن پاک کے مطالعے کے دوران بہت کچھ سیکھنے کا دعویٰ بھی کیا ہے۔ ان کا کہنا ہے کہ قرآن پڑھنے کے بعد تمام غلط فہمیاں دور ہوجاتی ہیں۔
ہالی ووڈ اسٹار ول اسمتھ نے ’شاہد‘ پلیٹ فارم پر ’بگ ٹائم پوڈ کاسٹ‘ پروگرام کے ذریعے صحافی عمرو ادیب کو انٹرویو دیتے ہوئے حیران کن انکشافات کیے ہیں۔ ایک سوال کے جواب میں انہوں نے کہا کہ میں روحانیت سے محبت کرتا ہوں۔
ول اسمتھ نے کہا کہ ان کی زندگی کے گزشتہ 2 برس مشکل تھے۔ اس دوران انہوں نے اپنے باطن کے بارے میں سوچنا شروع کیا، اس عرصے میں انہوں نے قرآن پاک سمیت تمام مقدس کتابیں پڑھیں اور ماہِ رمضان میں قرآن پاک کو مکمل طور پڑھا۔
انہوں نے مزید کہا کہ یہ میری زندگی میں روحانیت کی تلاش تھی۔ یہ میری زندگی کا وہ دور تھا جب میں اپنے دل کو زیادہ سے زیادہ وسعت دینا چاہتا تھا تاکہ میں پرسکون ہو سکوں۔
ہالی ووڈ اسٹار نے انکشاف کیا کہ قرآن میں حضرت موسیٰ (علیہ السلام) کا جتنی بار تذکرہ ہوا ہے اس سے وہ حیران رہ گئے، یہ دلچسپ بات ہے، مجھے اس واقعے اور تجربے نے بہت متاثر کیا۔ انہوں نے مزید کہا کہ میں سادگی سے متاثر ہوا ہوں، قرآن سادہ ہے اور اس میں چیزیں شیشے کی طرح بالکل واضح ہیں۔
ان کا کہنا تھا کہ قرآن پاک پڑھنے کے بعد کوئی غلط فہمی نہیں رہتی، قرآن کو گہرائی سے پڑھیں تو غلط فہمیاں دور ہوجاتی ہیں۔ انہوں نے کہا کہ ابراہیم علیہ السلام انبیاء کے والد ہیں۔ ان کی نسل سے اسماعیل اور اسحاق (علیہ السلام) آئے ۔ وہ سلسلہ نبوت کی پوری تصویر سمجھ کر خوش ہیں۔
