وزیراعظم پاکستان شہباز شریف نے سپریم کورٹ اور ہائیکورٹس کے ججوں کو ملنے والے دھمکی آمیز خطوط کی تحقیقات کرانے کا اعلان کردیا۔
کابینہ اجلاس سے خطاب کرتے ہوئے وزیراعظم پاکستان نے کہاکہ ججوں کو جو دھمکی آمیز خطوط موصول ہورہے ہیں، حکومت اس معاملے پر اپنی ذمہ داریاں پوری کرےگی۔
ہائیکورٹ ججوں کے خط کے معاملے پر گیند عدالت کی کورٹ میں ہے
وزیراعظم نے کہاکہ اسلام آباد ہائیکورٹ کے ججوں کی جانب سے لکھے گئے خط کے معاملے پر گیند اب عدالت کی کورٹ میں ہے، کیونکہ حکومت کی جانب سے جو کمیشن تشکیل دیا گیا تھا اس کے سربراہ نے معذرت کرلی ہے۔
انہوں نے کہاکہ سپریم کورٹ کے چیف جسٹس نے معاملے پر ازخود نوٹس لے لیا اور اس پر ایک سماعت بھی ہوچکی ہے۔
آئی ایم ایف پروگرام کی شرائط آسان نہیں ہوں گی
اس موقع پر وزیر اعظم پاکستان شہباز شریف نے مطلع کیاکہ رواں ماہ پاکستان کو آئی ایم ایف کی آئندہ قسط موصول ہوجائے گی، تاہم اسی کے ساتھ ہی انہوں نے خبردار کیا ہے کہ آئی ایم ایف پروگرام کی شرائط آسان نہیں ہوں گی۔
وزیر اعظم شہبازشریف کا کہنا تھا کہ رواں ماہ آئی ایم ایف سے آئندہ قسط موصول جائے گی، جبکہ نئے پروگرام سے متعلق وزیرخزانہ میٹنگ کریں گے۔
معیشت استحکام کی طرف گامزن ہے
مزید پڑھیں
وزیر اعظم کے مطابق ملکی معیشت استحکام کی طرف گامزن ہے، معاشی اعشاریوں میں بہتری اور مہنگائی میں بتدریج کمی آرہی ہے، معاشی استحکام سے ہی غربت کا خاتمہ ممکن ہے، غربت اور بیروزگاری کا خاتمہ حکومت کی اولین ترجیح ہے۔
پی آئی اے نجکاری کے شیڈول پر مکمل عمل درآمد ہوگا
شہبازشریف نے کہا کہ پی آئی اےکی نجکاری کے شیڈول پر مکمل عمل درآمد ہوگا، ان کا کہنا تھا کہ ائیرپورٹس کے معاملے پر ترک کمپنی کا وفد پاکستان آئےگا۔ائیرپورٹس کی آؤٹ سورسنگ کاکام جاری ہے، کراچی اور لاہور کے ہوائی اڈوں کو بین الاقوامی معیار کی سہولیات سے آراستہ کریں گے۔
