چینی باشندوں کی سیکیورٹی: وزیراعظم کا ہر ماہ خود جائزہ لینے کا فیصلہ

وزیرِ اعظم محمد شہباز شریف نے تمام سیکیورٹی اداروں کو چینی باشندوں کی سیکیورٹی کو فول پروف بنانے کے لیے اقدامات اٹھانے کی ہدایت کرتے ہوئے کہا ہے کہ دہشت گردی کی عفریت کے ملک سے خاتمے تک اس کے خلاف جنگ جاری رکھیں گے۔

وزیر اعظم آفس کے میڈیا ونگ سے جمعہ کو جاری بیان کے مطابق وزیر اعظم کی زیرِ صدارت ملک میں امن و امان کی صورت حال کے حوالے سے اعلیٰ سطح کا اجلاس یہاں منعقد ہوا۔اس موقع پر خطاب کرتے ہوئے وزیر اعظم نے کہا کہ دہشت گردی کی عفریت کے ملک سے خاتمے تک اس کے خلاف جنگ جاری رکھیں گے۔

وزیرِاعظم نے وزارت داخلہ کو ملک میں دہشت گردی کے خاتمے اور صوبائی انسداد دہشت گردی محکمہ جات کی مزید بہتری کے لیے صوبوں سے تعاون بڑھانے کی ہدایت کی۔

وزیرِ اعظم نے ملکی سیکیورٹی بالخصوص مختلف منصوبوں پر کام کرنے والے چینی باشندوں کی سیکیورٹی کے حوالے سے اجلاسوں کا ہر ماہ خود جائزہ لینے کا فیصلہ کیا۔

وزیرِاعظم نے تمام سیکیورٹی اداروں کو چینی باشندوں کی سیکیورٹی کو فول پروف بنانے کے لیے اقدامات کی بھی ہدایت کی۔وزیرِاعظم نے سیکیورٹی ایس او پیز کے باقاعدگی سے آڈٹ کے لیے ایک جامع لائحہ عمل بنانے کی ہدایت کی۔

وزارت داخلہ نے اجلاس میں وزیرِاعظم کو ملکی مجموعی امن و سلامتی کی صورت حال اور وزارت کی کارکردگی کے حوالے سے بریفنگ دی۔اجلاس میں وفاقی وزیر داخلہ سید محسن نقوی، سکیورٹی اداروں کے سربراہان اور متعلقہ اعلیٰ حکام نے شرکت کی۔