وزیراعظم محمد شہباز شریف سعودی عرب کا 3 روزہ کامیاب دورہ مکمل کرنے کے بعد وطن واپس پہنچ گئے ہیں۔
وزیراعظم آفس کے میڈیا ونگ سے جاری کردہ بیان میں بتایا گیا ہے کہ وزیر اعظم میاں محمد شہباز شریف سعودی عرب کا 3 روزہ دورہ مکمل کرنے کے بعد پیر کی رات وطن واپس پہنچ گئے ہیں۔
مزید پڑھیں
واضح رہے کہ وزیر اعظم شہباز شریف نے اپنے 3 روزہ دورۂ سعودی عرب میں عمرہ کی ادائیگی روضہ رسول ﷺ پر حاضری کے بعد سعودی عرب کی اعلیٰ قیادت سے اہم ملاقاتیں بھی کیں۔
دورہ سعودی عرب کے دوران سعودی ولی عہد شہزادہ محمد بن سلمان کی طرف سے وزیر اعظم کو ان کے کابینہ کے اراکین سمیت افطار ڈنر بھی دیا گیا۔
افطار ڈنر کے بعد وزیر اعظم پاکستان نے سعودی عرب کے ولی عہد شہزادہ محمد بن سلمان سے ون آن ون ملاقات بھی کی جس میں دونوں جانب سے خیر سگالی کے جذبات کا اظہار کیا گیا۔
ملاقات میں دونوں رہنماؤں نے تمام عالمی و علاقائی خصوصاً مسئلہ فلسطین، غزہ پر اسرائیلی جارحیت اور مسئلہ کشمیر سمیت دیگر اہم اقتصادی، معاشی اور تجارتی امور پر تبادلہ خیال کیا۔
اس دوران وزیر اعظم محمد شہباز شریف نے سعودی عرب کے ولی عہد شہزادہ محمد بن سلمان کو پاکستان کے دورے کی دعوت بھی دی جو انہوں نے قبول کر لی۔
