وزیراعظم پاکستان شہباز شریف نے وفد کے ہمراہ سعودی عرب کے ولی عہد اور وزیراعظم شہزادہ محمد بن سلمان کی خصوصی دعوت پر افطار ڈنر میں شرکت کی ہے۔
اس موقع پر وزیراعظم پاکستان شہباز شریف اور سعودی عرب کے ولی عہد شہزادہ محمد بن سلمان کے درمیان ون آن ون ملاقات بھی ہوئی۔
وزیراعظم نے خادم حرمین شریفین شاہ سلمان بن عبدالعزیز کی صحت کے لیے دعا اور نیک خواہشات کا اظہار کیا۔ اور سعودی حکام کی جانب سے اپنے اور وفد کے پرتپاک استقبال پر شکریہ ادا کیا۔
مزید پڑھیں
دونوں رہنماؤں نے دیرینہ برادرانہ تعلقات پر اطمینان کا اظہار کیا، اور مزید مضبوط بنانے کے عزم کا اعادہ کیا۔
یاد رہے کہ سعودی عرب کے ولی عہد شہزادہ محمد بن سلمان نے وزیراعظم پاکستان میاں محمد شہباز شریف کو افطار کی خصوصی دعوت دی تھی۔
یہ بھی واضح رہے کہ وزیراعظم پاکستان شہباز شریف اپنے وفد کے ہمراہ گزشتہ روز سعودی عرب پہنچے تھے۔ شہباز شریف کا وزارت عظمیٰ کا منصب سنبھالنے کے بعد یہ پہلا غیر ملکی دورہ ہے۔ جبکہ وزیراعلیٰ پنجاب مریم نواز شریف بھی وزیراعظم کے ہمراہ ہیں۔
ترجمان دفترخارجہ نے بتایا تھا کہ وزیراعظم شہبازشریف 6 سے 8 اپریل تک سعودی عرب میں قیام کے دوران وفد کے ہمراہ عمرہ ادا کریں گے اور مسجد نبویؐ میں نماز ادا کریں گے۔
وزیراعظم کے وفد میں وزیرخارجہ اسحاق ڈار، وزیرخزانہ محمد اورنگزیب، وزیردفاع خواجہ آصف، عبد العلیم خان، عطاء اللہ تارڑ اور احد خان چیمہ شامل ہیں۔
