نیوزی لینڈ کے خلاف ہوم سیریز: پاکستان ٹیم کا اعلان، عماد اور عامر کی واپسی

پاکستان کرکٹ بورڈ نے نیوزی لینڈ کے خلاف ہوم سیریز کے لیے 17 رکنی پاکستانی اسکواڈ کا اعلان کر دیا ہے۔ ریٹائرمنٹ واپس لینے والے عماد وسیم اور محمد عامر کی ٹیم میں واپسی ہو گئی ہے۔

لاہور میں پریس کانفرنس کرتے ہوئے پاکستان کرکٹ بورڈ کی سلیکشن ٹیم نے بتایا کہ قومی اسکواڈ میں بابراعظم ( کپتان)، صائم ایوب، محمد رضوان، عثمان خان، افتخار احمد، اعظم خان، عرفان خان نیازی، شاداب خان، عماد وسیم، شاہین شاہ آفریدی، نسیم شاہ، زمان خان، محمد عامر، عباس آفریدی، اسامہ میر، فخرزمان اور ابرار احمد شامل ہیں۔

مزید پڑھیں

• نیوزی لینڈ کے خلاف ٹی20  سیریز: ٹیم منیجمنٹ کا اعلان، اظہر محمود ہیڈ کوچ مقرر

  

• کاکول ٹریننگ کیمپ کا مقصد ٹیم کے تعلقات اور اتحاد کو بڑھانا تھا، بابر اعظم

  

• قومی کرکٹ ٹیم کا فزیکل ٹریننگ کیمپ ختم، اعظم خان توجہ کا مرکز رہے

  

سلیکشن کمیٹی نے بتایا کہ حارث رؤف کو انجری کی وجہ سے شامل نہیں گیا تاہم محمد نواز کو ڈراپ کردیا گیا جبکہ 5 کھلاڑی حسیب اللہ، محمد علی، صاحبزادہ فرحان، آغا سلمان اور وسیم جونیئر ریزرو کیٹیگری میں شامل ہیں۔

سینئر ٹیم مینیجر وہاب ریاض نے بتایا کہ ہم نے ورلڈکپ کو مدنظر رکھ کر بہترین ٹیم کا انتخاب کیا ہے، ہم لڑکوں سے بات کرچکے ہیں، ورک لوڈ کو مدنظر رکھ کر کھیلیں گے، عثمان خان کی گزشتہ 2، 3 سال سے اچھی کارکردگی رہی ہے، اس لیے وہ پاکستان ٹیم کا حصہ بنے ہیں۔

محمد یوسف نے کہا کہ ہم سب ایک پیج پر ہیں، چاہتے ہیں پاکستان اچھا کھیلے، ہم رہیں یا نہ رہیں لیکن اچھی ٹیم بنانا چاہتے ہیں۔

یاد رہے کہ 5 میچوں کی سیریز 18 سے 27 اپریل تک راولپنڈی اور لاہور میں کھیلی جائے گی جس کے لیے نیوزی لینڈ کی کرکٹ ٹیم 14 اپریل کو پاکستان پہنچے گی۔ سابق ٹیسٹ کرکٹر اظہر محمود کو نیوزی لینڈ کے خلاف ٹی ٹوئنٹی سیریز کے لیے پاکستان ٹیم کا ہیڈ کوچ مقرر کیا گیا ہے۔