غیر قانونی پاسپورٹ بنانے میں ملوث عناصر کے خلاف کریک ڈاؤن کے دوران ایف آئی اے نے کراچی میں افغان شہری سمیت 4 ملزموں کو گرفتار کرلیا ہے، پاسپورٹ آفس کے باہر سے گرفتار ملزمان میں ایجنٹ اور سہولتکار دونوں شامل ہیں۔
مزید پڑھیں
ایف آئی اے اینٹی ہیومن ٹریفکنگ سرکل کراچی نے ایک بڑی کارروائی کرتے ہوئے 4 ملزمان کو گرفتار کرلیا ہے جن کی شناخت مجیب اللہ، حماد احمد، محمد انیس اور غلام عباس کے ناموں سے ہوئی ہے۔
ترجمان ایف آئی اے کے مطابق گرفتار ملزمان میں ایجنٹ اور سہولتکار بھی شامل ہیں جبکہ ایک افغان شہری بھی گرفتار کیا گیا ہے، ملزم مجیب اللہ نے ایجنٹ اور سہولتکاروں کی مدد سے پاکستانی پاسپورٹ حاصل کرنے کی کوشش کی، ملزمان کو پاسپورٹ آفس صدر کراچی کے باہر سے گرفتار کیا گیا ہے۔
ابتدائی تفتیش کے مطابق ملزم مجیب اللہ کا اصل نام زرداد ہے اور تعلق افغانستان سے ہے، جو چند ماہ قبل غیر قانونی طریقے سے بارڈر پار کر کے پاکستان پہنچا تھا، ملزم اپنی والدہ کے علاج کے لئے پاکستان آیا تھا، ملزم نے جعل سازی سے مجیب اللہ کے نام سے پاکستانی شناختی کارڈ بھی حاصل کیا۔
ایف آئی اے ترجمان کے مطابق ملزم کے قبضے سے امیراں بی بی کے نام سے شناختی کارڈ کی کاپی بھی برآمد ہوئی ہے، دوران تلاشی دیگر ملزمان سے پاسپورٹ فیس کے چالان، شناختی کارڈز کی کاپیوں سمیت اے ٹی ایم کارڈز، ڈیتھ سرٹیفکیٹس بھی برآمد ہوئے ہیں۔
ترجمان ایف آئی اے کا کہنا ہے کہ ملزمان کو گرفتار کر کے تفتیش کا آغاز کر دیا گیا ہے اور ملزمان کی نشاندہی پر مزید گرفتاریاں متوقع ہیں۔
