ایف آئی اے امیگریشن نے کراچی ایئرپورٹ پر نائیجریا سے آنے والے مسافر کو گرفتار کرلیا ہے۔ حامد سفیر نامی مسافر بین الااقوامی پرواز کے ذریعے پاکستان پہنچا تھا۔ ملزم کا اصل نام قیصر شہباز ہے اور تعلق منڈی بہاوالدین سے ہے، ملزم نے حامد سفیر کے پاسپورٹ پر ٹمپرنگ کرکے اپنی تصویر لگا رکھی تھی۔
ترجمان ایف آئی کے مطابق مذکورہ پاسپورٹ پر بارسلونا کی جعلی اسٹمپ بھی لگی ہوئی تھی، مذکورہ پاسپورٹ پر بیرون ملک روانگی کی بھی جعلی اسٹمپ لگی ہوئی تھی۔ ابتدائی تفتیش کے مطابق ملزم اپنے پاسپورٹ پر پاکستان سے یو اے ای گیا پھر ٹمپرڈ پاسپورٹ پر یو اے ای سے اسپین جانے کی کوشش کی۔
ملزم نے ایجنٹ سے بھاری رقوم کے عوض مذکورہ پاسپورٹ حاصل کیا تھا۔ ملزم کو بعد ازاں مزید قانونی کارروائی کے لیے اینٹی ہیومن ٹریفکنگ سرکل کراچی منتقل کر دیا گیا ہے۔
