پاکستان بھر میں یونین کونسل سطح پر شناختی کارڈ بنانے اور تجدید کی سہولت ہوگی، محسن نقوی

وفاقی وزیر داخلہ محسن نقوی نے کہا ہے کہ پاکستان بھر میں یونین کونسل کی سطح پر شناختی کارڈ بنانے اور تجدید کی سہولت دی جائے گی۔ پاکستان بھر میں یونین کونسل کی سطح پر بائیو میٹرک مشینیں لگائی جائیں گی۔ انہوں نے یونین کونسل کی سطح پر شناختی کارڈ اور تجدید کی سہولت فراہم کرنے کے پلان کو چند روز میں حتمی شکل دینے کی ہدایت کردی۔

وفاقی وزیر داخلہ محسن نقوی نے نادرا ہیڈ کوارٹر کا دورہ کیا اور شناختی کارڈز کے نظام کو فول پروف۔ بہتر اور تیز رفتار بنانے کا پلان طلب کرلیا۔ ان کا کہنا تھا کہ ملک بھر میں نادرا سینٹرز کے دورے کیے اور حالات کا جائزہ لیا، عوام کو شدید مشکلات کا سامنا ہے۔

محسن نقوی نے کہا کہ ایسا پلان بنایا جائے جس سے نادرا سینٹرز پر آنے والوں کو آسانی ہو اور کام بلا تاخیر ہو۔ وزیر داخلہ نے 6 بڑے شہروں کراچی، لاہور، پشاور، کوئٹہ، اسلام آباد اور راولپنڈی میں میں نادرا سینٹرز میں اضافے کا 7 روز میں پلان طلب کرتے ہوئے جعلی شناختی کارڈ مافیا کے خاتمے کے لیے مؤثر ایکشن کا حکم بھی دیا۔

وفاقی وزیرداخلہ نے نادرا کے آپریشنل روم کا دورہ کیا جہاں انہیں پاکستان بھر کے نادرا سینٹرز کی ڈیجیٹل مانیٹرنگ نظام کے بارے بریفنگ دی گئی۔ نادرا کو عوام کے لیے مزید فرینڈلی بنانے کے لیے مختلف تجاویز کا جائزہ بھی لیا گیا۔ سیکریٹری داخلہ خرم آغا اور نادرا کے اعلیٰ حکام بھی اس موقع پر موجود تھے۔