وفاقی وزیر مذہبی امور چوہدری سالک حسین نے مکہ مکرمہ میں پاکستان حج میڈیکل مشن کے تحت قائم مرکزی اسپتال کا دورہ کیا۔
وزیر مذہبی امور نے ڈی جی حج عبدالوہاب سومرو، ڈائریکٹر مکہ فہیم آفریدی کے ہمراہ عازمین حج سے تاثرات بھی لیے۔
مزید پڑھیں
اس موقع پر سربراہ حج میڈیکل مشن بریگیڈیئر جمیل لاکھیر نے وزیر مذہبی امور کو اسپتال کے شعبوں کا دورہ کروایا اور بریفنگ دی۔
وزیر مذہبی امور چوہدری سالک حسین نے پاکستانی عازمین حج کے لیے دستیاب طبی سہولیات کے معیار پر اطمینان کا اظہار کیا۔
چوہدری سالک حسین نے کہاکہ وطن سے دور ہم زبان معالج کی دستیابی کسی نعمت سے کم نہیں۔ امسال ٹیسٹنگ سروس کے ذریعے حج میڈیکل مشن میں بہترین ڈاکٹرز اور پیرامیڈیکل اسٹاف کا انتخاب کیا ہے۔
انہوں نے کہاکہ اسپتال میں جدید ترین ایمبولینس سروس، لیبارٹری، ایکسرے، فارمیسی، زنانہ و مردانہ وارڈ، شعبہ دندان موجود ہیں۔
وزیر مذہبی امور نے کہاکہ عازمین حج متوازن غذا کا استعمال کریں اور ایام حج کے لیے جسمانی طور پر تیار رہیں۔
چوہدری سالک نے کہاکہ حج سخت گرمی کے موسم میں آرہا ہے، عازمین کرام مشروبات اور چھتری کا استعمال لازمی کریں۔
