اسلام آباد ہائیکورٹ نے وزیر خزانہ اسحاق ڈار کی ڈپٹی وزیراعظم تعیناتی کے خلاف درخواست سماعت کے لیے مقرر کردی۔
چیف جسٹس اسلام آباد ہائیکورٹ جسٹس عامر فاروق کل پی ٹی آئی کے رہنما شیر افضل مروت کی درخواست پر سماعت کریں گے۔
مزید پڑھیں
شیر افضل مروت نے اپنے وکیل کے ذریعے عدالت عالیہ میں درخواست دائر کی، انہوں نے ریاض حنیف راہی ایڈووکیٹ کی خدمات حاصل کی ہیں۔
شیر افضل مروت نے وفاقی حکومت، وزیراعظم پاکستان، سیکریٹری کابینہ ڈویژن اور اسحاق ڈار کو فریق بنایا ہے۔
درخواست میں موقف اختیار کیا گیا ہے کہ آئین پاکستان میں ڈپٹی وزیراعظم کے عہدے کی کوئی گنجائش نہیں۔
درخواست میں کہا گیا ہے کہ ذاتی مفاد کے لیے ایک ہی شخص کو دو عہدے عوام کے خرچ پر دیے گئے ہیں۔
درخواست گزار نے عدالت سے استدعا کی ہے کہ اسحاق ڈار کو ڈپٹی وزیراعظم تعینات کرنے کا نوٹیفکیشن کالعدم قرار دیا جائے۔
