پاکستان میں گاڑیوں کی خصوصی نمبر پلیٹس نیلام کرنے کا پہلی بار انعقاد کیا گیا جس سب سے مہنگی نمبر پلیٹ 10 کروڑ روپے میں نیلام ہوئی۔
گاڑیوں کی خصوصی نمبر پلیٹس نیلام کرنے کا انعقاد محکمہ ایکسائز سندھ کی جانب سے کیا گیا، اس دوران کل 40 نمبر پلیٹس نیلام ہوئیں اور 67 کروڑ 54 لاکھ روپے جمع ہوئے۔
مزید پڑھیں
محکمہ ایکسائز سندھ کی جانب سے بتایا گیا ہے کہ پریمیئم نمبر پلیٹ 1 دس کروڑ روپے میں نیلام ہوئی ہے جبکہ نمبر 5 پلیٹ 5 کروڑ 30 لاکھ روپے میں نیلام ہوئی۔
اسی طرح نمبر 7 والی نمبر پلیٹ 4 کروڑ 60 لاکھ روپے، پلیٹ نمبر 8 چار کروڑ 10 لاکھ روپے، جبکہ پلیٹ نمبر 9 کی نیلامی 4 کروڑ روپے میں ہوئی۔
اس موقع پر سینیئر صوبائی وزیر شرجیل میمن نے تقریب سے خطاب کرتے ہوئے کہاکہ نیلامی کے عمل سے جو رقم حاصل کی گئی ہے یہ سیلاب زدگان کے گھر بنانے میں وقف کی جائے گی۔
انہوں نے کہاکہ حکومت سندھ سیلاب متاثرین کی بحالی کے لیے کوشاں ہے، اور فنڈز سے سیلاب متاثرین کے لیے مجموعی طور پر 2251 گھر تعمیر کیے جائیں گے۔
شرجیل میمن نے مزید کہاکہ بہت جلد نمبر پلیٹس کی نیلامی کا دوسرا مرحلہ بھی ہوگا، اور ہمیں امید ہے کہ تعمیر نو کی جاری کوششوں میں اضافی وسائل پیدا ہوں گے۔