خاتون ڈپٹی کمشنر اور بیوٹی پارلر عملے میں ہیئر کلر کے معاملے پر جھگڑا، بات فائرنگ تک پہنچ گئی

ڈیفنس بدر کمرشل میں محکمہ ریونیو میں تعینات خاتون ڈپٹی کمشنر اور بیوٹی پارلر کے عملے کے درمیان بالوں کے رنگ (ہیئر کلر) کی پیکنگ نہ دکھانے پر جھگڑا ہوگیا اور بات فائرنگ تک پہنچ گئی۔

پولیس کے مطابق، جھگڑے کے دوران بیوٹی پارلر کے مالک کی فائرنگ سے خاتون ڈپٹی کمشنر سنیا شیخ کے بھائی کا سیکیورٹی گارڈ زخمی ہوا۔ واقعہ کا مقدمہ سنیا شیخ کی مدعیت میں درخشاں تھانے میں درج کرلیا گیا۔

یہ بھی پڑھیں: کرکٹ میچ کے دوران امپائر کے غلط آؤٹ دینے پر ٹیموں میں جھگڑا، ویڈیو وائرل

پولیس کا کہنا ہے کہ یہ واقعہ 3 روز قبل پیش آیا۔ خاتون ڈپٹی کمشنر بیوٹی پارلر میں بالوں کو رنگ کرانے آئی تھی۔ ڈپٹی کمشنر سنیا شیخ کے مطابق، بیوٹی پارلر میں میری لیڈیز اسٹاف سے تلخ کلامی ہوئی، پارلر کا مالک آیا اور کہا ان کو دھکے دے کر باہر نکالو۔

انہوں نے مزید بتایا، ’میں نے 15 پر فون کرکے پولیس منگوائی، 15 پولیس نے دونوں پارٹیوں کو تھانے چلنے کا کہا، کچھ دیر میں میری بہنیں بھی پارلر میں آگئیں، میری بہنوں نے باہر جاکر بھائی کو بتایا کہ لیڈیز پارلر میں مرد بھی بیٹھے ہیں۔‘

یہ بھی پڑھیں: آزاد کشمیر میں درخت کاٹنے پر جھگڑا 3 افراد کی جان لے گیا

مدعی ڈپٹی کمشنر نے مزید بتایا، ’میرے بھائی نے پولیس سے بات کی جس پر پولیس نے سب مردوں کو باہر نکال دیا، میرا بھائی فرحان شیخ اپنے 2 گارڈز کے ساتھ ہم بہنوں کو دیکھنے اندر آیا، جس پر بیوٹی پارلر مالک نے فائرنگ کرکے سیکیورٹی گارڈ کو زخمی کردیا۔‘

پولیس کے مطابق، زخمی سیکیورٹی گارڈ نجی اسپتال میں زیرعلاج ہے جبکہ بیوٹی پارلر کے مالک بلال صدیقی کو گرفتار کرلیا گیا ہے۔