بالی وڈ کے ناموراداکار وکی کوشل کی حالیہ ریلیز ہونے والی فلم ‘بیڈ نیوز‘سے گانا ‘توبہ توبہ‘ ریلیز ہوتے ہی سوشل میڈیا کے تمام پلیٹ فارمز پر وائرل ہوگیا۔
اس گانے کی ویڈیو منظر عام پر آتے ہی نہ صرف بھارت بلکہ پوری دنیا میں اس کی گونج سنائی دے رہی ہے اور لوگ وکی کوشل کے منفرد ڈانس اسٹیپس کو نقل کرتے بھی نظر آرہے ہیں۔
سوشل میڈیا پر ایک ایسی ہی ویڈیو وائرل ہورہی ہے جس میں ایک صارف نے پورے گانے کے ورژن کو ہی بدل دیا، پرمجیت نامی انفلیونسر نے ’حسن تیرا توبہ توبہ‘ کے بول بدل کر ’ٹینڈے توری توبہ توبہ‘ گایا۔
View this post on Instagram
گانے کا نیا ورژن بھارتی انفلیونسر کی سبزیوں سے نفرت اور فاسٹ فوڈ کی پسندیدگی کو ظاہر کرتا ہے۔ ویڈیو میں گانے کے مزاحیہ اور نئے انداز میں پیش کیا گیا ہے جس میں انفلیونسر چہرے کے تاثرات انتہائی دلچسپ ہیں۔
ویڈیو میں فریج پر موجود ایک مینو کارڈ بھی دکھایا گیا ہے جس میں کریلے، ٹینڈے اور توری کے ساتھ صرف دال دکھائی دیتی ہے اور پڑوسی ڈومینوس کا پیزا آرڈر کر رہے ہوتے ہیں جس پر وہ اپنی والدہ کو گانے کے ذریعے درخواست کرتے ہیں کہ دال سبزی کے علاوہ کھانے میں کچھ اچھا بھی بنا لیں۔
اس ویڈیو کو چند دن قبل شیئر کیا گیا ہے اور اس پر اب تک بتیس ملین ویووز آ چکے ہیں اور اسے ’توبہ توبہ‘ گانے کا اب تک کا سب سے اچھا ورژن قرار دیا جا رہا ہے۔ ویڈیو کو بھارتی کرکٹر ویرات کوہلی نے بھی لائیک کیا ہے۔
ڈومینوس انڈیا کے آفیشل پیج نے بھی اس ریل پر تبصرہ کرتے ہوئے کہا کہ ’ممی کے لیے ٹینڈے والا پیزا بنا دیں‘ جس پر پرمجیت نے کہا کہ ٹینڈے ممی اور پیزا وہ کھا لیں گے۔
ویڈیو پر چند صارفین نے تبصرہ کرتے ہوئے کہا کہ یہ اوریجنل گانے سے زیادہ اچھا ہے جبکہ کئی صارفین یہ کہتے نظر آئے کہ یہ ویڈیو اوریجنل گانے کا ریکارڈ بھی توڑ سکتی ہے۔
واضح رہے اس سے قبل سوشل میڈیا پر ایک ایسی ہی ویڈیو وائرل ہوئی تھی جس میں ایک دیہاتی خاتون کو اپنے بچوں کے ہمراہ وکی کوشل کے وائرل ڈانس موو کو کاپی کرتے دیکھا گیا۔ جس پر چند ہی گھنٹوں میں کئی ملین ویوز جمع ہو گئے اور اداکار وکی کوشل بھی سراہے بنا نہ رہ سکے۔ وکی کوشل نے اس ویڈیو پر تبصرہ کرتے ہوئے’واہ’ لکھا تھا۔
یاد رہے کہ وکی کوشل کی نئی فلم ’بیڈنیوز‘19 جولائی کو ریلیز ہوئی ہے جس کا گانا ’توبہ توبہ‘ آتے ہی چھا گیا اور چند گھنٹوں میں ہی ملین ویووز حاصل کرنے میں کامیاب رہا۔
