پیرس اولمپکس 2024 میں دو کانسی کے تمغے جیتنے والی انڈین شوٹر منو بھاکر اور جیولِن تھرو میں چاندی کا تمغہ جیتنے والے نیرج چوپڑا کی شادی کی افواہیں گردش کر رہی ہیں۔
سوشل میڈیا پر چاندی کا میڈل جیتنے والے نیرج چوپڑا کی منو بھاکر اور ان کی والدہ سمیدھا بھاکر سے خوشگوار انداز میں ملاقات کی ویڈیوز بھی وائرل ہو رہی ہیں جس میں منو بھاکر کی والدہ نیرج کا ہاتھ پکڑ کر اپنے سر پر رکھتی ہیں اور محبت بھرے انداز میں بات کر رہی ہیں۔
ویڈیوز وائرل ہونے کے بعد صارفین نے چہ مگوئیاں شروع کردیں کہ انڈیا کے دونوں اولمپک میڈلسٹ جلد شادی کرنے والے ہیں تاہم منو بھاکر کے والد نے نیرج چوپڑا سے شادی کی خبروں کی تردید کرتے ہوئے کہا کہ ان کی بیٹی کی ابھی شادی کی عمر نہیں ہے اور ان کی توجہ صرف کیرئیر پر مرکوز ہے۔
منو کے والد کا مزید کہنا تھا کہ منو کی ماں نیرج کو اپنا بیٹا مانتی ہیں اس لیے دونوں کے درمیان خاص بندھن بن گیا ہے جبکہ نیرج اور منو کے درمیان کوئی رومانوی تعلق نہیں ہے۔
دوسری جانب نیرج چوپڑا کے چچا نے بھی شادی کی افواہوں کی تردید کرتے ہوئے کہا کہ جس طرح نیرج تمغہ لے کر آئے اور پورے ملک کو اس کے بارے میں پتہ چل گیا اسی طرح جب وہ شادی کریں گے تب بھی سب کو پتہ چل جائے گا۔
