راولپنڈی کی سیشن عدالت نے پولیس کو پاکستان تحریک انصاف ( پی ٹی آئی) کے کارکنوں کو ہراساں کرنے سے روکتے ہوئے سی پی او راولپنڈی کو حکم دیا ہے کہ وہ پی ٹی آئی کارکنوں کو ہراساں نہ کیے جانے کو یقینی بنائیں۔
یہ بھی پڑھیں:کہا گیا کہ جلسہ 8 ستمبر کو کرلیں مگر اب راستے بند کیے جارہے ہیں، عمران خان
پاکستان تحریک انصاف راولپنڈی کے کارکنوں نے سیشن عدالت راولپنڈی میں درخواست میں شکایات کی تھی کہ پی ٹی آئی کے جلسہ میں شریک ہونے سے روکنے کے لیے پولیس کارکنوں کو ہراساں کر رہی ہے۔ درخواست انصاف لائرز فورم کے صدر رضوان اعوان کی جانب سے دائر کی گئی تھی
راولپنڈی سیشن عدالت میں ایڈیشنل ڈسٹرکٹ اینڈ سیشن جج محمد وسیم انجم پی ٹی آئی کے کارکنوں کی درخواست پر کارروائی کرتے ہوئے سی پی او راولپنڈی کو ہدایت کی کہ وہ تحریک انصاف کے کارکنوں کو ہراساں نہ کیے جانے کو یقینی بنائیں۔
یہ پڑھیں: جیل سے باہر آکر تمہیں اور چیئرمین نیب کو نہیں چھوڑوں گا، عمران خان کی نیب تفتیشی آفیسر کو دھمکی
عدالت نے سی پی او کو یہ حکم بھی جاری کیا کہ وہ جلسے میں شرکت کےلیے جانے والے پی ٹی آئی کے کارکنوں کے راستے میں رکاوٹیں بھی کھڑی نہ کریں، سی پی او کو یہ بھی ہدایت کی گئی کہ وہ تمام ایس ایچ اوز کو احکامات جاری کریں کہ وہ عدالتی فیصلے پر عمل درآمد کو یقینی بنائیں۔عدالت نے اپنے ریمارکس میں کہا کہ پُرامن جلسہ کرنا آئین اور قانون کے تحت ہر جماعت کا بنیادی حق ہے۔
