پی ٹی آئی احتجاج، اسلام آباد میں موٹرسائیکل کی ڈبل سواری پر پابندی عائد

جمعرات 3 اکتوبر 2024
icon-facebook icon-twitter icon-whatsapp

پاکستان تحریک انصاف (پی ٹی آئی) کے احتجاج کے پیش نظر اسلام آباد انتظامیہ نے دارالحکومت میں موٹرسائیکل کی ڈبل سواری پر پابندی عائد کردی۔

اسلام آباد انتظامیہ نے کہا ہے کہ سیکیورٹی صورتحال کے پیش نظر 2 روز کے لیے موٹرسائیکل کی ڈبل سواری پر پابندی کا فیصلہ کیا گیا ہے، جس کا اطلاق رات 12 بجے سے ہوگا۔

یہ بھی پڑھیں پی ٹی آئی کی ڈی چوک میں احتجاج کی کال، کارکنوں کی پکڑ دھکڑ شروع، مختلف راستے بند

واضح رہے کہ پاکستان تحریک انصاف نے کل ڈی چوک میں احتجاج کی کال دی ہے، جبکہ دوسری جانب حکومت نے مظاہرین سے نمٹنے کی حکمت عملی بھی طے کرلی ہے۔

آج اسلام آباد میں پریس کانفرنس کرتے ہوئے وفاقی وزیر داخلہ محسن نقوی نے پی ٹی آئی سے اپیل کی کہ وفاقی دارالحکومت میں اہم نوعیت کے اجلاس اور ملاقاتیں ہورہی ہیں اس کے لیے احتجاج ملتوی کیا جائے ورنہ سختی سے نمٹا جائے گا۔

انہوں نے کہاکہ تحریک انصاف نے کل احتجاج کی کال دی ہے، لیکن ہمیں سوچنا چاہیے کہ کوئی احتجاج پاکستان کی قیمت پر نہیں ہونا چاہیے، پی ٹی آئی بھی پاکستان کی جماعت ہے کوئی باہر کی جماعت نہیں۔

دوسری جانب پاکستان تحریک انصاف (پی ٹی آئی) کل ڈی چوک کا احتجاج مئوخر کرنے پر راضی ہوگئی ہے اور حکومت کو مشروط پیشکش کردی ہے۔

یہ بھی پڑھیں پی ٹی آئی ڈی چوک احتجاج مئوخر کرنے پر آمادہ، اہم شرط رکھ دی

پی ٹی آئی کے سینیئر رہنما زین قریشی نے نجی ٹی وی سے گفتگو کرتے ہوئے کہاکہ ہم کل کا احتجاج مئوخر کرنے کے لیے تیار ہیں لیکن اس کے لیے حکومت کو 26ویں آئینی ترمیم کو 23 اکتوبر سے آگے لے جانا ہوگا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp