عمران خان کی حمایت کرنے والے عوامی مسلم لیگ کے سربراہ اور سابق وفاقی وزیر داخلہ شیخ رشید احمد آج کل منظرِ عام سے غائب ہیں اور سیاست میں بھی متحرک نہیں رہے۔ ایک طرف جب پاکستان تحریک انصاف (پی ٹی آئی) جڑواں شہروں میں احتجاج کررہی ہے، شیخ رشید کی ایک ویڈیو وائرل ہورہی ہے جس میں انہیں اپنے کتوں کے ساتھ صبح کی واک کرتے ہوئے دیکھا جا سکتا ہے۔
اسلام آباد :سابق وفاقی وزیر داخلہ شیخ رشید احمد اپنے کتوں کے ساتھ صبح کی واک کرتے ہوئے#SheikhRasheed https://t.co/rB1JIfY4Ii pic.twitter.com/8xHbUNaUiP
— Sheikh Rashid Ahmed (@ShkhRasheed) October 4, 2024
ویڈیو پر صارفین کی جانب سے مختلف تبصرے کیے جا رہے ہیں۔ کسی کا کہنا ہے کہ سیاست سے دوری کے بعد شیخ رشید کے پاس اب یہی ایک کام رہ گیا ہے جبکہ کسی کا کہنا تھا کہ ایک طرف عمران خان صاحب جیل میں ہیں اور پی ٹی آئی نے آج احتجاج کی کال دے رکھی ہے اور خود کو عمران خان کا دوست کہنے والے شیخ رشید پی ٹی آئی کے کسی بھی احتجاج میں نظر نہیں آتے۔
جہاں ایک طرف ان کی پی ٹی آئی سے دوری کی بات کی جارہی ہے وہیں چند صارفین ایسے بھی ہیں جن کا خیال ہے کہ شیخ رشید اپنے کتوں کے ساتھ ڈی چوک کی جانب ہی رواں دواں ہیں جہاں وہ پی ٹی آئی کے احتجاج میں شرکت اختیار کریں گے۔
شیخ صاحب اپنے سپاہیوں کے ساتھ ڈی چوک کے لیے رواں دواں 🔥
— ڈگری والا مزدور (@syedahsanaliza7) October 4, 2024
پی ٹی آئی کے حامی ایک صارف نے شیخ رشید سے درخواست کی کہ آج ڈی چوک میں پی ٹی آئی کے احتجاج میں شامل ہوکر اپنا جلوہ ہی دکھا دیں۔
شیخ صاحب ڈی چوک جلوہ ہی دکھا دیو
— M Usman (@HaadiMian) October 4, 2024
کئی صارفین شیخ رشید سے سوال کرتے نظر آئے کہ انہوں نے سیاست سے دوری کیوں اختیار کرلی ہے اور وہ کسی قسم کا بیان دینے سے گریزاں کیوں ہیں۔
واضح رہے کہ آج اسلام آباد کے ریڈ زون پر پی ٹی آئی کے احتجاجی مظاہرے کے پیش نظر وفاقی دارالحکومت نے اکثر داخلی اور خارجی راستوں کو کنٹینرز لگا کر بند کردیا ہے جبکہ احتجاج کرنے والے متعدد افراد کو گرفتار بھی کرلیا ہے۔
پی ٹی آئی کی جانب سے احتجاج کی کال کے باعث دارالحکومت اسلام آباد میں موٹرسائیکل کی ڈبل سواری پر پابندی عائد ہے اور موبائل فون سروسز بھی معطل ہے۔
واضح رہے کہ اسلام آباد کی ضلعی انتظامیہ نے شہر میں دفعہ 144 نافذ کی ہے اور ’پرامن اسمبلی پبلک آرڈر ایکٹ 2024‘ کے تحت دارالحکومت کے بعض مقامت پر عوامی اجتماعات کے انعقاد پر پابندی عائد ہے۔
