پاکستان تحریک انصاف (پی ٹی آئی) کے احتجاج کے باعث اسلام آباد سمیت کئی شہروں میں راستے بند ہونے کی وجہ سے شہریوں کو شدید مشکلات کا سامنا ہے۔
اسلام آباد میں کچھ لوگ ایسے بھی ہیں کہ جن کی شادیاں انہی دنوں ہونی تھیں تاہم راستوں کی بندش کی وجہ سے شادی ہال تک پہنچنا ناممکن ہوگیا۔ اس صورتحال میں کئی جوڑے ایسے بھی ہیں جن کی شادی تو ہوگئی لیکن راستے بند ہونے کی وجہ سے وہ فوٹو شوٹ کی جگہ پر نہیں پہنچ سکے۔
نئے شادی شدہ جوڑے فوٹو شوٹ کے لیے خوبصورت جگہ کا انتخاب کرتے ہیں تاکہ وہ لمحات انہیں ہمیشہ یاد رہیں، اور اسی لیے اسلام آباد میں ایک نوبیاہتا جوڑے نے راستے بند کرنے کے لیے لگائے گئے کنٹینرز کو فوٹو شوٹ کے لیے منتخب کرلیا۔
سوشل میڈیا پر وائرل ہونے والی ویڈیوز میں دلہا اور دلہن کو کنٹینرز کے سامنے فوٹو شوٹ کراتے دیکھا جاسکتا ہے۔ ان کنٹینرز پر اسپرے سے 804 بھی لکھا ہوا ہے۔
وائرل ویڈیوز پر سوشل میڈیا صارفین اپنی اپنی رائے دے رہے ہیں۔ ایک صارف نے ویڈیوز پر تبصرہ کرتے ہوئے لکھا کہ ’لو جی کمال ہوگیا‘۔
لو جی کمال ہو گیا#چلو_چلو_اسلام_آباد_چلو #احتجاج_سے_انقلاب_تک pic.twitter.com/qXMmuJt3eW
— Munazza Shaikh (@Munazza__Shaikh) November 25, 2024
عارفہ عابد نے کنٹینر کے سامنے ہونے والے فوٹو شوٹ پر اپنی رائے دیتے ہوئے لکھا کہ یہ ہمیشہ کے لیے زندہ رہنے والی یادیں ہیں۔
ہمیشہ کے لۓ زندہ رہنے والی یادیں https://t.co/5Bw1X0Nq0i
— Arifa Abid (@Abid7Arifa) November 25, 2024
ایک صارف نے لکھا کہ یہ عمران خان کے ساتھ محبت نہیں عشق ہے کہ یہ جوڑا کنٹینر کے آگے فوٹو شوٹ کروا رہا ہے۔
واہ واہ۔
یہ محبت نہیں۔ یہ عشق ہے اپنے کپتان کے ساتھ۔۔
سلامت رہیں۔ https://t.co/lppAiJM5BS— Amir Qazi (@SAI_Qazi) November 25, 2024
عبد الرحمان نے طنزاً لکھا کہ اب وزیر داخلہ اس جوڑے کا نکاح نامہ منسوخ کردے گا۔
اب وزیر داخلہ ان کا نکاح نامہ منسوخ کر دے گا
— Abdul Rehman (@AbRehman800) November 25, 2024
واضح رہے کہ اس سے قبل بھی 2 دلہے اپنی باراتوں سمیت ٹریفک میں پھنس گئے تھے، جنہیں بہت زیادہ منت سماجت کے بعد جانے کی اجازت دی گئی جبکہ لاہور میں راستے بند ہونے کی وجہ سے دلہا اپنی دلہنیا کو موٹر سائیکل پر بٹھا کر رخصت کرکے لے گیا۔
