رینجرز اہلکاروں پر شرپسندوں کے حملے کی سی سی ٹی وی فوٹیج منظرعام پر آگئی، جس میں دیکھا جاسکتا ہے کہ شرپسندوں کی تیز رفتار گاڑی نے کس طرح نام نہاد احتجاج کی آڑ میں اسلام آباد میں ڈیوٹی پر مامور رینجرز اہلکاروں کو کچلا ہے۔
سیکیورٹی ذرائع کی جانب سے دی گئی سی سی ٹی وی فوٹیج کے مطابق واقعہ 26نومبر2024 کی رات 2بجکر 44منٹ پر رونما ہوا۔ سی سی ٹی وی فوٹیج میں واضح طور پر دیکھا جاسکتا ہے کہ تیز رفتار گاڑی درخت کے عقب سے آتے ہوئے رینجرز اہلکاروں کو کچلتے ہوئے آگے نکل گئی۔
مزید پڑھیں: احتجاج کی آڑ میں پرتشدد کاروائیوں میں پولیس اور رینجرز اہلکار شہید، سرکاری املاک کو نقصان
سیکیورٹی ذرائع نے بتایا کہ اس افسوسناک واقع میں رینجرز کے 3اہلکار شہید ہوگئے اور 3شدید زخمی ہوئے۔ واقعہ اُس وقت پیش آیا جب رینجرز جوان ناکہ پر تعینات ہو رہے تھے۔ یہ واقعہ بھی شر پسندوں کی منظم اور سوچی سمجھی حکمت عملی کے تحت کیا گیا۔
سیکیورٹی ذرائع نے بتایا کہ سی سی ٹی وی فوٹیج میں واضح دیکھا جا سکتا ہے کہ کس طرح سوشل میڈیا پر واقع کو حقائق کے برعکس توڑ مروڑ کر جھوٹا پروپیگنڈا کیا جا رہا ہے۔ اس سے قبل بھی پرتشدد مظاہرین کی متعدد ویڈیوز منظرِ عام پر آچکی ہیں۔
یہ بھی پڑھیں: رینجرز اور پولیس پر حملے کرنے والوں کو انصاف کے کٹہرے میں لائیں گے، شہباز شریف
تاہم، سی سی ٹی وی فوٹیجز کے ذریعے شرپسندوں کی شناخت کا عمل جاری ہے، واقع میں ملوث شرپسندوں کے خلاف سخت قانونی کارروائی عمل میں لاکر قرار واقعی سزا دی جائے گی۔
