احتجاج کی آڑ میں پی ٹی آئی کارکنان کی پرتشدد کاروائیاں جاری ہیں۔ سوشل میڈیا پر وائرل ویڈیوز سے واضح ہے کہ توڑ پھوڑ اور جلاؤ گھیراؤ ایک منصوبہ بندی کے تحت کیا گیا۔ پی ٹی آئی کارکنان نے سرکاری املاک پہ حملے کیے اور ناقابل تلافی نقصان پہنچایا۔ پی ٹی آئی کے شرپسند کارکنان کے حملوں سے رینجرز کے 3 اہلکار شہید جبکہ متعدد زخمی ہوئے۔ اس کے علاوہ پنجاب پولیس کے 2 اہلکار شہید جبکہ قریباً 119 اہلکار زخمی ہیں۔
اعداد و شمار کے مطابق مظاہرین کے حملوں سے پنجاب پولیس کی 22 گاڑیوں کو نقصان پہنچا۔ پرتشدد کارروائیوں کے باعث اسلام آباد پولیس کے 11 اہلکار شدید زخمی ہیں۔ پرتشدد کارروائیوں میں رینجرز کے 3 اہلکار شہید اور 5 شدید زخمی ہیں۔
مزید پڑھیں: 4 رینجرز اہلکاروں کی شہادت کے بعد اسلام آباد میں فوج طلب، شرپسندوں کو دیکھتے ہی گولی مارنے کا حکم
شہید ہونے والے رینجرز کے اہلکاروں میں نائیک محمد رمضان شہید(عمر 47 سال، ساکن ضلع کرک)، سپاہی گلفام خان شہید (عمر 29سال، ساکن ضلع راولپنڈی ) اور سپاہی شاہنواز شہید (عمر 33سال، ساکن ضلع سبی) شامل ہیں۔ رینجرز کے شدید زخمی اہلکاروں میں نائیک عارف، لانس نائیک آصف اور سپاہی اشرف علی شامل ہیں۔
پی ٹی آئی کے پرتشدد مظاہرین نے سرکاری املاک پر بھی حملے کیے۔ پرتشدد واقعات اور توڑ پھوڑ کی متعدد ویڈیوز منظر عام پر آ چکی ہیں۔ پی ٹی آئی کارکنان نے مختلف مقامات میں آگ لگائی اور سرکاری املاک کو نقصان پہنچایا۔
پولیس کی جانب سے متعدد پرتشدد مظاہرین کو گرفتار کیا گیا ہے، شرپسند عناصر کی شناخت کاعمل تیزی سے جاری ہے۔ پرتشدد عناصر کے خلاف سخت قانونی کارروائی عمل میں لائی جائے گی۔
