سیکیورٹی فورسز نے خیبرپختونخوا میں 2 مختلف آپریشنز کے دوران فتنہ الخوارج کے 8 دہشتگردوں کو ہلاک کردیا ہے، جبکہ اس دوران فائرنگ کے تبادلے میں کیپٹن سمیت 2 جوان شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے ضلع بنوں کے علاقے بکا خیل میں دہشتگردوں کی موجودگی کی اطلاعات پر آپریشن کیا۔
یہ بھی پڑھیں سیکیورٹی فورسز کا خیبرپختونخوا میں خفیہ اطلاع پر آپریشن، 3خوارج ہلاک
آئی ایس پی آر نے بتایا کہ سیکیورٹی فورسز کی جانب سے آپریشن کے دوران دہشتگردوں کے ساتھ فائرنگ کا تبادلہ ہوگیا، اس دوران فورسز نے 5 دہشتگردوں کو ہلاک کردیا جبکہ 9 زخمی ہوگئے۔
فوج کے شعبہ تعلقات عامہ نے بتایا کہ آپریشن کے دوران پاک فوج کے سپاہی افتخار حسین نے بہادری سے لڑتے ہوئے جام شہادت نوش کیا۔
آئی ایس پی آر کے مطابق سیکیورٹی فورسز نے دوسری کارروائی ضلع خیبر کے علاقے شگئی میں کی، اس دوران 3 دہشتگرد ہلاک ہوگئے جبکہ 2 کو سیکیورٹی فورسز نے گرفتار کرلیا۔
فوج کے شعبہ تعلقات عامہ کے مطابق ضلع خیبر میں ہونے والے آپریشن کے دوران دہشتگردوں کی فائرنگ سے کیپٹن محمد زوہیب الدین شہید ہوگئے۔
آئی ایس پی آر کے مطابق مارے گئے دہشتگرد سیکیورٹی فورسز کے ساتھ ساتھ عام بے گناہ شہریوں کے خلاف دہشتگردی کی متعدد کارروائیوں میں ملوث تھے۔
آئی ایس پی آر نے بتایا کہ علاقے میں کسی بھی دہشتگرد کے خاتمے کے لیے کلیئرنس آپریشن کیا جارہا ہے۔
یہ بھی پڑھیں پاکستان میں دہشتگردی کی نئی لہر، وجوہات کیا ہیں؟
آئی ایس پی آر نے کہاکہ پاکستان کی سکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں، ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
