سپریم کورٹ کے ججز کے مابین مبینہ توتکرار اور ہاتھا پائی کی خبروں پر ترجمان سپریم کورٹ کا بیان سامنے آ گیا ہے۔
سپریم کورٹ کی جانب سے جاری اعلامیہ میں کہا گیا ہے کہ ججوں کے درمیان لڑائی جھگڑے کی خبریں من گھڑت ہیں۔
سپریم کورٹ اعلامیہ میں کہا گیا کہ واک کے دوران ججز میں تلخ کلامی اور جھگڑے کی خبریں جھوٹ اور جعلی رپورٹنگ کا نتیجہ ہیں۔
اعلامیہ میں کہا گیا کہ اس رپورٹ کی سخت ترین الفاظ میں تردید کی جاتی ہے۔ یہ جھوٹ، شرارتی اور بدنیتی پر مبنی ہے۔ ایسا کوئی واقعہ پیش نہیں آیا۔
ترجمان نے واضح کیا ہے کہ سپریم کورٹ آف پاکستان کے ججز کے بارے میں جعلی رپورٹنگ قانون کی سنگین خلاف ورزی ہے اور یہ عدالت اور اس کے معزز ممبران کے وقار کو کم کرنے کے لیے منحرف عناصر کی کوشش کو ظاہر کرتی ہے۔
واضح رہے کہ کل سے مختلف سوشل میڈیا پلیٹ فارمز پر ججز کالونی میں سپریم کورٹ کے ججز کے درمیان لڑائی سے متعلق خبریں گردش کر رہی ہیں۔
