جنوبی کوریا میں گزشتہ روز حادثے کا شکار والے نجی کمپنی کے طیارے کے مالک نے واقعے پر سر جھکا کر معافی مانگ لی ہے۔ نجی ایئرلائن جیجو کا مسافر بردار طیارہ اتوار کے دن تھائی لینڈ سے آتے ہوئے جنوبی کوریا کے موان ایئرپورٹ پر لینڈنگ کے دوران حادثے کا شکار ہوا تھا جس میں اب تک 179مسافر جان سے گئے ہیں جب کہ صرف 2 فضائی میزبانوں کو زندہ بچا لیا گیا ہے۔
کمپنی کے سی ای او نے اس حادثے کو افسوس ناک قرار دے کر اس پر سر جھکا کر معافی مانگ لی۔ انہوں نے حادثے کا شکار ہونے والے افراد کے لواحقین سے اظہار تعزیت بھی کیا ہے۔
یہ بھی پڑھیےالمناک فضائی حادثے میں جنوبی کوریا کا مسافر طیارہ تباہ، 124 افراد ہلاک، ویڈیو سامنے آگئی
دوسری طرف مذکورہ حادثے کی ابتدائی تحقیقات پر مبنی رپورٹ سامنے آگئی ہے۔ رپورٹ کے مطابق طیارے سے لینڈنگ کے دوران پرندے ٹکرائے جس کے بعد پائلٹ نے مے ڈے کال دی۔ اس موقع پر کنٹرول ٹاور کی طرف سے مذکورہ طیارے کو رن وے پر مخالف سمت سے لینڈنگ کی اجازت دی گئی مگر لینڈنگ کے دوران، طیارے کی لینڈنگ گئیر میں خرابی پیدا ہوئی جس کی وجہ سے جہاز رن وے سے نکل کر حفاظتی دیوار سے ٹکرایا اور دھماکا ہوا۔
یہ بھی پڑھیےروسی صدر ولادیمیر پیوٹن نے مسافر طیارے کے حادثے پر آذربائیجان سے معافی مانگ لی
یاد رہے کہ چند روز قبل آذربائیجان کا ایک مسافر بردار جہاز بھی مغربی قازقستان میں گر کر تباہ ہوگیا تھا جس میں 38افراد ہلاک ہوئے تھے۔
مذکورہ حادثے کا ذمہ دار ممکنہ طور پر روس کے دفاعی نظام کو قرار دیا جارہا ہے تاہم روس کے صدر ولادیمیر پوٹن نے واقعے کی ذمہ داری قبول کیے بغیر حادثے پر معذرت کی ہے۔
