سپریم کورٹ کی جانب سے وزیراعظم سمیت وفاقی کابینہ کو سنگین نتائج کا عندیہ

سپریم کورٹ آف پاکستان نے وفاقی حکومت کو حکم دیا ہے کہ پنجاب میں انتخابات کے لیے 27 اپریل تک 21 ارب روپے الیکشن کمیشن کو جاری کیے جائیں۔

عدالت عظمیٰ کی جانب سے تحریری حکمنامے میں کہا گیا ہے کہ انتخابات کے لیے فنڈز جاری کرنا وفاقی حکومت کی آئینی ذمہ داری ہے جس کو ادا نہ کرنے اور عدالتی احکامات کی خلاف ورزی کے وزیراعظم اور وفاقی کابینہ کے لیے سنگین نتائج برآمد ہوں گے۔

عدالت کی جانب سے جاری کیے گئے تحریری حکم نامے میں کہا گیا ہے کہ الیکشن اسی صورت میں بہتر ہوں گے جب سیاسی جماعتوں کی مشاورت شامل ہو۔

سپریم کورٹ نے کہا ہے کہ تمام سیاسی جماعتوں کے اعلیٰ عہدیداران کل عدالت میں پیش ہوں۔ بادی النظر میں انتخابات کے لیے سیاسی جماعتوں کو مذاکرات کا موقع دینے کی رائے درست ہے۔

عدالت نے کہا ہے کہ مذاکرات کا موقع دینے کا ہرگز مطلب نہیں کہ سپریم کورٹ کا پنجاب میں 14 مئی کو انتخابات کرانے کا حکم ختم ہو گیا۔ تمام سیاسی جماعتیں اپنے اپنے نمائندے نامزد کریں۔

تحریری حکمنامے میں کہا گیا ہے کہ سپریم کورٹ 4 اپریل کو انتخابات سے متعلق فیصلہ دے چکی ہے۔ سیاسی جماعتوں کی متفقہ رائے سے ہی انتخابات کا عمل بہتر ہوگا۔

سپریم کورٹ کے حکمنامے کے مطابق ملک کی تمام سیاسی جماعتوں کو نوٹسز جاری کیے جاتے ہیں۔ جماعت اسلامی کو اس کے امیرکے ذریعے نوٹس جاری کیا جاتا ہے۔

عدالت حکمنامے میں کہا گیا ہے کہ الیکشن کمیشن، اٹارنی جنرل اور وفاقی حکومت کو بھی نوٹسز جاری کیے جاتے ہیں۔