وفاقی حکومت نے اسلام آباد میں 10 ارب روپے کی لاگت سے سفاری پارک کی تعمیر کے منصوبے کی تصدیق کردی ہے۔
کیپٹل ڈیولپمنٹ اتھارٹی (سی ڈی اے) کی جانب سے اس منصوبے کا اعلان وزیر داخلہ محسن نقوی نے سیرینا انٹرچینج کے افتتاح کے موقع پر کیا۔
یہ بھی پڑھیں:کراچی تھر ڈیزرٹ سفاری ٹرین کا آغاز، مسافروں کا شاندار استقبال
حکام نے مجوزہ سفاری پارک کو فاطمہ جناح پارک میں قائم کرنے کے آپشن پر غور کیا تھا، تاہم اب اس ضمن میں متبادل جگہوں کی تلاش جاری ہے۔
ذرائع سے پتہ چلتا ہے کہ وزیر داخلہ محسن نقوی لاہور کی طرز پر دارالحکومت اسلام آباد میں بھی اسی نوعیت کی عوامی دلچسپی کا منصوبہ شروع کرنے کا ارادہ رکھتے ہیں۔
مزید پڑھیں:سفاری پارک میں ہتھنی سونیا کی موت کیسے ہوئی؟ پوسٹ مارٹم رپورٹ میں اہم انکشاف
واضح رہے کہ اس سے قبل بحیثیت نگراں وزیر اعلیٰ پنجاب کے طور پر محسن نقوی اپنے دور حکومت میں لاہور میں سفاری پارک کی تعمیر کی نگرانی کی تھی۔
لیگی رکن قومی اسمبلی طاہرہ اورنگزیب کے تحریری جواب میں وزیر داخلہ نے اسمبلی کو بتایا کہ سفاری پارک کا منصوبہ اپنی جگہ پر موجود ہے، تاہم اس کی ابھی تعمیر شروع نہیں ہوئی ہے۔
مزید پڑھیں:لاہور چڑیا گھر بھی نیلام کردیا گیا؟
وزیر داخلہ کے مطابق کام شروع ہونے کے بعد یہ منصوبہ 18 ماہ میں مکمل ہونے کی امید ہے۔
دوسری جانب سی ڈی اے نے پچھلے 5 سالوں میں کمرشل پلاٹوں کی نیلامی سے 129 ارب روپے سے زائد آمدنی حاصل کی ہے، ان نیلامیوں سے حاصل ہونے والی آمدنی سے دارالحکومت میں سفاری پارک سمیت مختلف ترقیاتی اقدامات پر عملدرآمد کی توقع ہے۔
