وزیراعظم کے مشیر رانا ثنا اللہ نے کہا ہے کہ قومی سلامتی کمیٹی کے اجلاس میں شرکت نہ کرکے بانی پی ٹی آئی نے اپنے اوپر مذاکرات کے دروازے بند کر دیے ہیں۔
نجی ٹی وی سے گفتگو کرتے ہوئے رانا ثنا اللہ کا کہنا تھا کہ ہم 8 ماہ سے مذاکرات کا کہہ رہے ہیں، جو شخص قومی سلامتی اور ملکی وجود کے بارے میں دیگر سیاسی جماعتوں کے ساتھ بیٹھنے کے لیے تیار نہیں، اس سے مزید کیا گفتگو کی جا سکتی ہے۔
رانا ثنا اللہ نے کہا کہ دہشتگردوں کا کوئی دین ایمان نہیں، نہتے مسافروں کو شہید کیا گیا، یہ دہشتگرد کسی رعایت کے مستحق نہیں۔ انہیں ختم کیا جانا ضروری ہے۔ دہشتگردی کی کارروائیوں کا کوئی جواز پیش نہیں کیا جا سکتا، لیکن ایک سیاسی جماعت کے سوشل میڈیا نے وہی پراپیگنڈا کیا جو انڈین میڈیا کر رہا تھا۔
مزید پڑھیں: بلوچستان واقعات میں ملوث ’را‘ دہشتگردوں کی ’ماں‘ کا کردار ادا کر رہی ہے، رانا ثنا اللہ
انہوں نے کہا کہ جعفر ایکسپریس کا واقعہ ہوتے ہی انڈین میڈیا نے شور و واویلا شروع کردیا، یوں لگتا ہے جیسے انڈین میڈیا اور مخصوص سیاسی جماعت کو اس حملے کا پتا تھا۔ اس میں کوئی شک نہیں کہ پاکستان میں ہونے والی دہشتگردی میں را کا ہاتھ ہے۔ فنڈنگ اور اسلحہ بھی وہیں سے آتا ہے لیکن پوری قوم کو اپنے شہدا اور غازیوں کے ساتھ کھڑے ہونا چاہیے۔
ایک سوال پر ان کا کہنا تھا کہ نواز شریف ہمارے قائد ہیں اور ہمیں ان کی رہنمائی میسر ہے۔ عید کے بعد اپوزیشن کی آل پارٹیز کانفرنس میں شرکت کا فیصلہ 7 اتحادی جماعتوں کی مشاورت سے کریں گے۔
