اسلام آباد اور گرد و نواح میں زلزلے کے جھٹکے، لوگ گھروں سے باہر نکل آئے

وفاقی دارالحکومت اسلام آباد اورخیبرپختونخوا کے متعددعلاقوں میں زلزلے کے جھٹکے محسوس کئے گئے ہیں۔

یہ بھی پڑھیں:سوات اور گردونواح میں زلزلہ، 4.4 شدت ریکارڈ

 ترجمان ریسکیو1122 خیبرپختونخوا کے مطابق پشاور، چارسدہ، نوشہرہ، مردان، سوات، ابیٹ آباد سمیت خیبرپختونخوا کے مختلف علاقوں میں زلزلے کے جھٹکے محسوس کیے گئے، تاہم ریسکیو1122 کنٹرول روم کو تاحال کسی قسم کی ایمرجنسی سے متعلق کال موصول نہیں ہوئی۔

ریکٹر اسکیل پر زلزلے کی شدت معلوم کی جا رہی ہے، شہری زلزلہ آتے ہی گھروں سے باہر نکل آئے اور کلمہ کا ورد کرنے لگے۔

زلزلہ کیوں آتاہے؟

زلزلہ کیوں آتاہے؟ اس کی کیاسائنسی وجوہات ہیں، ماہرین ارضیات اس بارے میں کیاکہتے ہیں؟

زیر زمین ارضیاتی پلیٹیں یا بڑی بڑی چٹانیں جب شدید دباؤکے تحت ٹوٹتی اور سرکتی ہیں تو زمین کی سطح پر اس کے شدید اثرات  نمودارہوتے ہیں، جنہیں  زلزلے کا نام دیاجاتا ہے۔

زلزلے کا مرکزی مقام محور کہلاتا ہے جبکہ محورکے عین اوپرکے مقام کو زلزلے کا مرکز یا ایپی سنٹر کہا جاتا ہے۔

3 طرح کی لہریں زلزلے کا باعث بنتی ہیں

ماہرین کے مطابق  3 طرح کی لہریں زلزلے کا باعث بنتی ہیں جنہیں سائنس مک ویوز کہا جاتا ہے۔ انہیں پی، ایس اور ایل ویو بھی کہاجاتا ہے۔ یہ  لہریں محور سے تمام اطراف میں پھیلتی ہیں۔

زلزلے سے ہونے والے نقصان کا انحصار اس کی زیر زمین گہرائی اور شدت پرہوتاہے سطح زمین سے گہرائی جتنی کم ہوگی سطح زمین کے اوپر تباہی اتنی ہی زیادہ ہوگی۔