عیدالاضحیٰ قریب آتے ہی ملک بھر میں قربانی کے جانوروں کی خریداری شروع ہو چکی ہے۔ کئی مقامات پر مویشی منڈیاں قائم ہو گئی ہیں جہاں نہایت خوبصورت جانور فروخت کے لیے پیش کیے جارہے ہیں تاہم حیدرآباد کا40 من وزنی بیل ’جے ایف 17 تھنڈر‘ توجہ کا مرکزبنا ہوا ہے۔
’جے ایف 17 تھنڈر‘ بیل کو دیکھنے کے لیے شہری دور دور سے آ رہے تھے اور اس کے ساتھ سیلفیاں بنا رہے تھے۔ مویشی کے مالک نے اپنے بھاری بھرکم جانور کی قیمت 50 لاکھ روپے لگائی جس کا سودا بھی طے ہوگیا ہے۔
View this post on Instagram
خریدار بیل کو لینے آئے تو اس موقع پر بیل کے مالک شاہ رخ نے ایک پنڈال سجایا، جہاں خریداروں کی خوب خاطر تواضع کی گئی۔ مہمانوں اور میزبانوں نے ایک دوسرے کو نوٹوں اور پھولوں کے ہار پہنائے اور ثقافتی اجرک بھی پیش کی۔
بیل کی فروخت پر صارفین کی جانب سے مختلف تبصرے کیے جا رہے ہیں۔ علی نامی صارف نے لکھا کہ عید قربان قریب آتے ہی ڈرامے شروع کر دیے گئے ہیں جبکہ ایک صارف نے لکھا کہ یہ اچھی تشہیری مہم چل رہی ہے۔
یہ بھی پڑھیں: ’اونٹ نے تسلی سے اپنے دانت چیک کروا دیے‘، کراچی میں جانور نے شہری کا ہاتھ چبا لیا
عمر بشیر نے بیل کی قیمت دیکھتے ہوئے تبصرہ کیا کہ اس بار منڈی بہت تیز ہے۔ ایک سوشل میڈیا صارف کا کہنا تھا کہ اس سے اچھا J 10C خرید لیں وہ قیمت میں کم اور زیادہ موثر ہو گا۔ ایک صارف نے طنزاً کہا کہ ایسے نہ بولو انڈینز برا مان جائیں گے۔
جہاں کئی صارفین بیل کی خوبصورتی کی تعریف کرتے نظر آئے وہیں چند صارفین نے تنقید کرتے ہوئے کہا کہ لوگوں نے قربانی کو بھی فیشن بنا دیا ہے۔ اسلام پیچھے رہ گیا ہے اور آج کل کے مسلمان ٹرینڈز پر چل رہے ہیں۔
