پاکستان اسٹاک ایکسچینج میں تاریخی تیزی، 100 انڈیکس پہلی بار ایک لاکھ 24 ہزار کی سطح عبور کر گیا۔ بجٹ تجاویز کے مثبت اثرات کے باعث آج کاروبار کے دوران انڈیکس میں 1985 پوائنٹس کا نمایاں اضافہ ہوا، جس سے انڈیکس ایک لاکھ 24 ہزار 10 پوائنٹس تک جا پہنچا۔
مزید پڑھیں: پاکستان اسٹاک ایکسچینج میں کاروباری ہفتے کا مثبت آغاز، 100انڈیکس میں 1100 پوائنٹس کا اضافہ
ٹریڈنگ کے دوران انڈیکس مختصر وقت کے لیے 1,24,040 کی نئی بلند ترین سطح پر بھی پہنچا۔ گزشتہ روز انڈیکس 1,22,024 پر بند ہوا تھا۔
گزشتہ روز کی کارکردگی
یاد رہے کہ گزشتہ روز وفاقی بجٹ پیش ہونے سے محض چند گھنٹے قبل پاکستان اسٹاک ایکسچینج میں کاروباری سرگرمیاں عروج پر رہیں اور کے ایس ای 100 انڈیکس تاریخی سطح پر بند ہوا۔ بدھ کو انڈیکس 383 پوائنٹس کے اضافے کے ساتھ 122,024 پر بند ہوا، جب کہ کاروبار کے دوران ایک موقع پر یہ 122,611 پوائنٹس کی بلند ترین سطح تک جا پہنچا۔
کاروباری دن کے دوران مارکیٹ میں مجموعی طور پر 59 کروڑ شیئرز کے سودے ہوئے جن کی مالیت 21.8 ارب روپے رہی۔ مارکیٹ کیپٹلائزیشن 40 ارب روپے اضافے کے ساتھ 14,768 ارب روپے ہو گئی۔
