بھارتی پنجابی فلم ’سردار جی 3‘ کا ٹریلر ریلیز ہونے کے بعد دلجیت دوسانجھ اور ان کی فلم کے بائیکاٹ کی مہم زور پکڑ گئی ہے اور ان کے پاسپورٹ منسوخ کیے جانے کا مطالبہ بھی کیا جا رہا ہے۔
ایسے میں انہوں ںے ایک انٹرویو میں کہا کہ جب انہوں نے یہ فلم سائن کی تب بھارت اور پاکستان کے درمیان حالات ٹھیک تھے۔ ان کا کہنا تھا کہ اس کے بعد بہت سی چیزیں ہوئیں جو ہمارے کنٹرول میں نہیں ہیں۔ جب پہلگام حملہ ہوا تو پروڈیوسرز کو معلوم تھا کہ اب یہ فلم بھارت میں ریلیز نہیں ہو سکتی۔ لیکن انہوں نے فیصلہ کیا کہ وہ یہ فلم بیرونِ ملک ریلیز کریں گے کیونکہ انہوں نے اس پر بہت پیسہ لگایا ہے۔
اب ان کا ایک پرانا ویڈیو کلپ بھی سوشل میڈیا پر گردش کر رہا ہے جس میں وہ یہ کہتے نظر آ رہے ہیں ’مجھے بالی ووڈ میں کام کرنے کا کوئی شوق نہیں ہے۔ مجھے ایک بڑا بالی ووڈ اسٹار بننے کی بھی کوئی خواہش نہیں ہے‘۔
View this post on Instagram
دلجیت دوسانجھ کا کہنا تھا کہ ’مجھے بالی ووڈ میں کام نہیں کرنا، میری ایسی کوئی خواہش نہیں ہے کہ میں بالی ووڈ میں کوئی بہت بڑا اداکار بن جاؤں۔ میں میوزک کو پیار کرتا ہوں اور کسی کی مرضی کے بغیر بھی میں میوزک بنا سکتا ہوں۔ کوئی بندہ مجھے روک نہیں سکتا جب تک میرا دل کرے گا میں میوزک بناؤں گا اور بالی ووڈ میں کوئی کام ملے یا نہ ملے مجھے اس کی ذرا پرواہ نہیں ہے‘۔
واضح رہے کہ سردار جی 3 کو بیرون ملک میں 27 جون کو ریلیز کیا جا رہا ہے تاہم بھارت میں اس فلم کی ریلیز نہیں ہوگی۔ یہ ایک کامیڈی فلم ہے جس میں دلجیت دوسانجھ اور ہانیہ عامر کو بھوتوں کا پیچھا کرتے دکھایا گیا ہے۔
