حکومت نے ملک بھر میں بجلی کی بچت کے لیے ایک نیا پروگرام شروع کرنے کا فیصلہ کیا ہے، جس کے تحت پرانے پنکھوں کو توانائی بچانے والے نئے پنکھوں سے تبدیل کیا جائے گا۔
وزارتِ خزانہ کے اعلامیے کے مطابق، وفاقی وزیر خزانہ محمد اورنگزیب کی زیر صدارت پیر کے روز ایک اعلیٰ سطحی اجلاس منعقد ہوا، جس میں وزیراعظم کے پنکھا تبدیلی پروگرام کی پیش رفت کا جائزہ لیا گیا، اجلاس میں وفاقی وزیر برائے توانائی اویس لغاری، گورنر اسٹیٹ بینک اور دیگر اعلیٰ حکام نے شرکت کی۔
یہ بھی پڑھیں:دن میں 12 گھنٹے اے سی، روم کولر اور پنکھا چلانے سے کتنے یونٹ خرچ ہوں گے؟
اجلاس کا مقصد پروگرام کے جلد آغاز کو یقینی بنانا اور اس کے مختلف پہلوؤں پر پیش رفت کا جائزہ لینا تھا، نیشنل انرجی ایفیشنسی اینڈ کنزرویشن اتھارٹی کے حکام نے اجلاس کو بتایا کہ پروگرام کے آغاز کے لیے ضروری اقدامات جاری ہیں، جن میں بینکوں سے معاہدوں کو حتمی شکل دینا، بینکاری نظام کا انضمام، اور پنجاب ٹیکنالوجی انویسٹمنٹ بورڈ اور پاور انفارمیشن ٹیکنالوجی کمپنی کا تعاون شامل ہے، جو اس منصوبے کی جلد اور موثر تکمیل میں مدد فراہم کر رہے ہیں۔
وزیر خزانہ محمد اورنگزیب نے کہا کہ یہ منصوبہ نہ صرف توانائی کے بہتر استعمال کو فروغ دے گا بلکہ مالیاتی مواقع پیدا کرے گا اور معاشی استحکام میں بھی کردار ادا کرے گا، انہوں نے امید ظاہر کی کہ اس پروگرام سے صارفین کے رویّے میں مثبت تبدیلی آئے گی اور مجموعی طور پر معیشت کو فائدہ ہوگا۔
مزید پڑھیں:میٹر ریڈنگ ایپ کیا ہے اور عوام کو اس سے کیا فائدہ ہوگا؟
محمد اورنگزیب نے تمام متعلقہ اداروں خصوصاً بینکاری شعبے کی فعال شرکت کو سراہا اور ہدایت کی کہ اگلے 2 سے 3 ہفتوں میں تمام تیاریوں کو مکمل کر کے پروگرام کے پہلے مرحلے کا آغاز کر دیا جائے، تاکہ رواں مہینے کے آخر تک ابتدائی بینکوں کے تعاون سے اس کا باضابطہ افتتاح کیا جاسکے۔
اجلاس کے اختتام پر تمام شرکا نے اس قومی منصوبے کے بروقت اور موثر نفاذ کے لیے اپنے مکمل تعاون کا یقین دلایا، جو حکومت کی معاشی اور توانائی اصلاحات کے وسیع تر اہداف کا حصہ ہے۔
