پاکستان شوبز انڈسٹری سے وابستہ معروف ہدایت کار سید نور کا کہنا ہے کہ خلیل الرحمان قمر کا مشہور ڈرامہ ’میرے پاس تم ہو‘ ان کی فلم کی نقل کر کے بنایا گیا ہے۔
سید نور نے حال ہی میں ایک پوڈ کاسٹ میں شرکت کی جہاں انہوں نے اپنے سفر، اپنے ساتھ کام کرنے والے باصلاحیت فنکاروں اور اپنی فلمی زندگی کے مختلف پہلوؤں پر بات کی۔
ہدایتکار نے بتایا کہ ماضی میں انہوں نے ایک فلم بنائی تھی جس میں ایک عورت کو زیور کا بہت شوق ہوتا ہے اوہ وہ اسی لالچ میں اپنا سب کچھ کھو دیتی ہے۔ ہمایوں سعید اور عائزہ خان کا ڈرامہ ’میرے پاس تم ہو‘ بھی اسی سے متاثر ہو کر بنایا گیا ہے۔
سید نور نے بتایا کہ ان کی اس فلم کا نام ’زیور‘ ہے جس میں ریما خان، بابر علی، جان ریمبو، صاحبہ اور شاہد نے اداکاری کی تھی جبکہ وہ خود اس کے ہدایتکار اور رائٹر تھے۔ یہ فلم 1998میں ریلیز ہوئی تھی۔
یاد رہے کہ ’میرے پاس تم ہو‘ پاکستان کے مقبول ترین ڈراموں میں شمار ہوتا ہے، جسے معروف مصنف خلیل الرحمٰان قمر نے تحریر کیا، ہدایت کاری ندیم بیگ نے انجام دی جبکہ ڈرامے کے پروڈیوسر ہمایوں سعید تھے۔ یہ ڈراما 17 اگست 2019 سے 25 جنوری 2020 تک نشر ہوا تھا۔
