مقامی ذرائع ابلاغ نشر ہونے والی خبر کے مطابق چیئرمین پاکستان تحریک انصاف عمران خان نے خبردار کرتے ہوئے کہا ہے کہ قوم تیاری کر لے، مزید مہنگائی آنے والی ہے۔
انہوں ں نے منعقدہ پریس کانفرنس سے خطاب کرتے ہوئے کہا کہ آئی ایم ایف کے پاس جانے کے علاوہ دوسرا کوئی راستہ نہیں ہے، نہ گئے تو ملک ڈیفالٹ کر جائے گا اور آئی ایم ایف کے پاس دوبارہ جائیں گے تو مزید مہنگائی بڑھے گی۔
سابق وزیراعظم عمران خان نے کہا کہ جب مشکل وقت آتا ہے تو ان کا مقابلہ کیا جاتا ہے، جرمنی اور جاپان نے ہم سے مشکل وقت دیکھا ہے، ہم سب نے مل کر مشکل وقت کا مقابلہ کرنا ہے۔
انہوں نے کہا کہ سازش کے ذریعے ہماری حکومت کو گرایا گیا، اپریل میں بد نیتی پر مبنی ایک غلط فیصلہ کیا گیا۔
کورونا کے باوجود ہماری حکومت میں ملک ترقی کررہا تھا، ہماری حکومت کو ختم کر کے چوروں کو ملک پر مسلط کیا گیا، 95 فیصد کیسز ہمارے آنے سے پہلے ان کے خلاف بنے ہوئے تھے۔
عمران خان نے سخت تنقید کرتے ہوئے کہا ان کے خلاف پیش ہونے والے چار گواہان ہارٹ اٹیک سے مر گئے، انہوں نے حکومت میں آکر 1100 ارب روپے کے کیسز ختم کیے، ساڑھے7 لاکھ کے قریب پاکستانی باہر چلے گئے ہیں۔
چیئرمین پی ٹی آئی نے کہا کہ ہر دوسرے دن میرے خلاف نیا مقدمہ بنا دیا جاتا ہے، میں ملک سے نہیں بھاگا، یہیں رہ کر مقدموں کا مقابلہ کروں گا، تیار ہو جائیں ہم نے اس ملک کو بحرانوں سے نکالنا ہے، ملک میں انصاف اور قانون ہو گا تو آگے جائے گا، طاقت ور جب قانون کے نیچے آئیں گے تو معاشرہ بنے گا۔
سابق وزیراعظم عمران خان نے پریس کانفرنس سے خطاب کرتے ہوئے کہا کہ ایسا نہیں ہوگا کہ طاقت ور چوری کر کے باہر چلا جائے اور غریب جیل جائے، ملک میں جب سیلاب آیا تو پیسہ اکٹھا کیا، پچھلے 30 سال سے ملک میں شوکت خانم کیلئے پیسے اکٹھے کر رہا ہوں، جتنی بھی ہم نے فنڈنگ حاصل کی وہ سب قانون کے مطابق ہے۔
