پاکستان کے خلاف پہلے ٹیسٹ میچ کے دوسرے روز کے اختتام پر جنوبی افریقہ نے پاکستان کی پہلی اننگز کے 378 رنزکے جواب میں 6 وکٹوں پر 216 رنز بنالیے۔
قبل ازیں قذافی اسٹیڈیم لاہور میں کھیلے جانے والے اس میچ میں پاکستان کی ٹیم اپنی پہلی اننگز میں 378 رنز بنا کر آؤٹ ہوگئی تھی۔
جنوبی افریقہ کے کپتان ایڈن مارکرم 45 کے مجموعی اسکور پر 20 رنز بنا کر نعمان علی کی گیند پر وکٹوں کے پیچھے محمد رضوان کے ہاتھوں کیچ آؤٹ ہوئے۔ ان کے بعد 80 کے مجموعی اسکور پر ویان ملڈر بھی نعمان علی کی گیند پر 17 رنز بنا کر محمد رضوان کے ہی ہاتھوں کیچ ہوئے۔علاوہ ازیں ریان رکلنٹن 71، اسٹبز 8، بریوس صفر اور ویرین 2 رنز بناکر آؤٹ ہوگئے۔
یہ بھی پڑھیے: 3 سال میں صرف 3 نصف سینچریز، بابر اعظم ٹیسٹ کرکٹ میں مکمل ناکام ہوگئے
میزبان ٹیم کی جانب سے نعمان علی نے 85 رنز کے عوض 4 وکٹیں حاصل کیں جبکہ سلمان علی آغا اور ساجد خان نے ایک، ایک کھلاڑی آؤٹ کیا۔
جنوبی افریقا کو پاکستان کی پہلی اننگز کا اسکور پورا کرنے کیلئے مزید 162 رنز درکار ہیں۔ٹونی ڈی زورزی 81 اور متھوسامے 6 رنز کے ساتھ ناٹ آؤٹ ہیں۔
پاکستان نے کھیل کے دوسرے روز 313 رنز 5 کھلاڑی آؤٹ سے اپنی نامکمل اننگز دوبارہ شروع کی جبکہ محمد رضوان 62 اور سلمان علی آغا 52 رنز کے ساتھ کریز پر موجود تھے۔
محمد رضوان نے ذمہ دارانہ بیٹنگ کرتے ہوئے 75 رنز کی اننگز کھیلی مگر وہ 362 کے مجموعے پر آؤٹ ہوگئے۔ ان کے آؤٹ ہونے کے فوراً بعد نعمان علی اور ساجد خان بغیر کوئی رن بنائے پویلین لوٹ گئے۔ یہ تینوں وکٹیں اسپنر سینوران متھوسامے کے حصے میں آئیں جنہوں نے شاندار بولنگ کرتے ہوئے مجموعی طور پر 6 کھلاڑیوں کو آؤٹ کیا۔
سلمان علی آغا بدقسمتی سے نروس نائنٹیز کا شکار ہوئے اور 93 رنز پر اپنی وکٹ گنوا بیٹھے، جبکہ شاہین شاہ آفریدی نے 7 رنز بنائے۔
یہ بھی پڑھیے: لاہور ٹیسٹ کے پہلے دن کا کھیل ختم: پاکستان نے جنوبی افریقہ کے خلاف 5 وکٹوں پر 313 رنز بنا لیے
پوری پاکستانی ٹیم پہلی اننگز میں 378 رنز پر پویلین لوٹ گئی۔ متھو سامے نے 6 کھلاڑیوں کو آؤٹ کیا جبکہ پرینیلان سبراین نے دو وکٹیں حاصل کی۔ کگیسو ربادا اور سائمن ہارمر نے ایک ایک وکٹ حاصل کی۔
