لیجنڈری اداکارہ اور رکنِ پارلیمنٹ ہیما مالنی نے اپنے شوہر اور معروف فلم اسٹار دھرمیندر کی موت سے متعلق پھیلنے والی جھوٹی خبروں کی سختی سے تردید کرتے ہوئے کہا ہے کہ وہ زندہ ہیں اور صحتیاب ہو رہے ہیں۔
گزشتہ شب سوشل میڈیا پر دھرمیندر کے انتقال کی افواہیں تیزی سے گردش کرنے لگیں، جس کے بعد مداحوں اور فلمی دنیا میں بے چینی کی لہر دوڑ گئی۔ تاہم ہیما مالنی نے ان خبروں کو ’غیر ذمہ دارانہ‘ قرار دیتے ہوئے کہا کہ ایسی جھوٹی اطلاعات پھیلانا ناقابلِ معافی عمل ہے۔
انہوں نے سماجی رابطوں کی سائٹ ایکس پر جاری اپنے بیان میں کہا کہ ’جو کچھ ہو رہا ہے وہ ناقابلِ معافی ہے۔ ذمہ دار میڈیا ادارے کسی ایسے شخص کے بارے میں جھوٹی خبریں کیسے پھیلا سکتے ہیں جو علاج کے دوران بہتری کی جانب گامزن ہے؟ یہ رویہ انتہائی غیر ذمہ دارانہ اور بے ادبی پر مبنی ہے۔ براہ کرم خاندان کی پرائیویسی کا احترام کیا جائے‘۔
What is happening is unforgivable! How can responsible channels spread false news about a person who is responding to treatment and is recovering? This is being extremely disrespectful and irresponsible. Please give due respect to the family and its need for privacy.
— Hema Malini (@dreamgirlhema) November 11, 2025
دوسری جانب دھرمیندر کی صاحبزادی ایشا دیول نے بھی انسٹاگرام پر ایک بیان میں افواہوں کی تردید کرتے ہوئے عوام کو یقین دلایا کہ ان کے والد کی حالت مستحکم ہے۔
انہوں نے لکھا کہ میڈیا بے بنیاد خبریں پھیلا رہا ہے۔ میرے والد کی صحت مستحکم ہے اور وہ صحتیاب ہو رہے ہیں۔ ہم تمام مداحوں سے درخواست کرتے ہیں کہ ہمارے خاندان کو پرائیویسی دی جائے۔ آپ سب کی دعاؤں کا شکریہ۔
View this post on Instagram
ذرائع کے مطابق، دھرمیندر کو گزشتہ روز ممبئی کے بریچ کینڈی اسپتال میں طبیعت ناساز ہونے پر داخل کرایا گیا تھا، جہاں انہیں ڈاکٹروں کی خصوصی نگہداشت میں رکھا گیا ہے۔
ہیما مالنی اور ایشا دیول دونوں نے عوام اور میڈیا سے اپیل کی ہے کہ وہ غیر مصدقہ خبریں پھیلانے سے گریز کریں اور خاندان کو اس وقت سکون اور پرائیویسی فراہم کریں۔
