مسلم لیگ (ن) کے سینیئر رہنما رانا ثنا اللہ نے کہا ہے کہ ضمنی انتخابات میں ووٹنگ کا عمل مکمل طور پر پرامن ماحول میں جاری ہے اور کسی بھی حلقے سے کسی نوعیت کی شکایت موصول نہیں ہوئی۔ انہوں نے کہا کہ عوام خدمت اور ترقی کے ایجنڈے پر اعتماد کرتے ہیں اور اسی بنیاد پر مسلم لیگ (ن) کو ووٹ دیں گے۔
اپنا ووٹ کاسٹ کرنے کے بعد میڈیا سے گفتگو کرتے ہوئے رانا ثنا اللہ نے بتایا کہ پولنگ کے 7 گھنٹے مکمل ہونے تک فیصل آباد کے 5 حلقوں سے حاصل شدہ اطلاعات کے مطابق کہیں بھی ہنگامی صورتحال، بے ضابطگی یا گرفتاری کی کوئی خبر نہیں ملی۔
مزید پڑھیں: ضمنی انتخابات: ضابطہ اخلاق کی خلاف ورزی پر رانا ثنا اللہ کو 50 ہزار روپے جرمانہ
انہوں نے کہا کہ اگر کوئی یہ دعویٰ کرے کہ جعلی ووٹ کاسٹ ہو رہے ہیں تو یہ درست نہیں۔ پورے صوبے میں پولنگ انتہائی منظم اور پرامن ہے۔
رانا ثناء اللہ نے کہا کہ مسلم لیگ (ن) نے ہمیشہ پاکستان کی ترقی، استحکام اور عوامی خدمت کو ترجیح دی ہے۔ انہوں نے کہا کہ ن لیگ کی ہر حکومت میں ملک نے معاشی، سماجی اور دفاعی میدان میں نمایاں پیشرفت کی۔
جو شخص جیل میں بیٹھ کر ملک میں افراتفری اور انارکی کی منصوبہ بندی کرے، جس کا 9 مئی اور 26 نومبر کا پچھلا ریکارڈ موجود ہو، اور جو لوگ ملاقاتوں کو ملک میں انتشار پھیلانے کا ذریعہ بنائیں تو انتظامیہ ایسی ملاقاتوں پر پابندی لگا سکتی ہے۔ رانا ثنا اللہ pic.twitter.com/wLYl3Bjz7I
— WE News (@WENewsPk) November 23, 2025
انہوں نے کہا کہ پاکستان نے بھارت کو ایسی شکست دی جو صدیوں یاد رکھی جائے گی، آج مودی دنیا بھر میں منہ چھپاتا پھر رہا ہے۔ 11 مئی 2025 اور 28 مئی 1998 پاکستان کی تاریخ کے بڑے دن ہیں جن پر پوری قوم کو فخر ہے۔
مزید پڑھیں: ’بینظیر انکم سپورٹ پروگرام بند ہونا چاہیے‘، رانا ثنا اللہ نے ایسا کیوں کہا؟
پی ٹی آئی کے بانی رہنما پر تنقید کرتے ہوئے رانا ثنا اللہ نے کہا کہ انہوں نے ہمیشہ سیاسی ڈیڈ لاک پیدا کیا، کبھی حقیقی سیاست نہیں کی، اور آج بھی بات چیت پر آمادہ نہیں۔ انہیں لانا اس ملک کی بدقسمتی تھی۔
انہوں نے کہا کہ پنجاب میں ترقی کا سفر جاری ہے اور عوام جانتے ہیں کہ ان کے مسائل کا حل مسلم لیگ (ن) کے پاس ہے۔ لوگ خدمت، کارکردگی اور ترقی کو ووٹ دے رہے ہیں، اور یہی ہماری کامیابی کی بنیاد ہے۔
