وفاقی وزیر داخلہ محسن نقوی اور وزیر مملکت طلال چوہدری نے لاہور ائیرپورٹ کا اچانک دورہ کرتے ہوئے امیگریشن نظام، مسافروں کی سہولت اور ایف آئی اے اہلکاروں کی کارکردگی کا جائزہ لیا۔ اس دوران وزیرداخلہ نے براہِ راست مسافروں سے گفتگو کی، شکایات سنیں اور موقع پر ہی احکامات جاری کیے۔
یہ بھی پڑھیں:وزیر داخلہ محسن نقوی کی برطانوی حکام سے ملاقات، کچھ پاکستانی شہریوں کی حوالگی پر تبادلہ خیال
لاہور ایئرپورٹ پر وفاقی وزیر داخلہ محسن نقوی اور وزیر مملکت داخلہ طلال چوہدری نے بیرون ملک سفر کرنے والے مسافروں کے امیگریشن پراسیس کا جائزہ لیا۔ دونوں وزرا امیگریشن کاونٹرز تک گئے اور عملے کی کارکردگی کا مشاہدہ کیا۔
وزیر داخلہ محسن نقوی نے بیرون ملک جانے والے مسافروں سے ملاقات کی اور امیگریشن کے عمل کے بارے میں اُن کی رائے معلوم کی۔ اس دوران محسن نقوی نے امیگریشن کاؤنٹر پر تعینات ایف آئی اے اہلکار کو اچھی کارکردگی پر شاباش دی اور حوصلہ افزائی کی۔
دورے کے دوران ایک مسافر نے چیکنگ میں تاخیر اور بورڈنگ بند ہونے کی شکایت کی جس پر وزیر داخلہ نے فوراً متعلقہ حکام کو کویت جانے والے مسافر کی بورڈنگ کرانے کا حکم دیا۔
مسافروں نے گفتگو میں بتایا کہ امیگریشن کا عمل چند ہی منٹ میں مکمل ہو رہا ہے جو خوش آئند ہے۔ اس موقع پر وفاقی وزیر داخلہ محسن نقوی کا کہنا تھا کہ پاکستان کی عزت اور مسافروں کی سہولت سب سے زیادہ اہم ہے۔
یہ بھی پڑھیں:لندن میں پی ایس ایل کا شاندار روڈ شو، محسن نقوی کا لیگ کو نمبر ون بنانے کا اعلان
انہوں نے کہا کہ کسی بھی مسافر کو بلاجواز سفر سے نہیں روکا جائے گا، تاہم پیشہ ور بھکاریوں یا نامکمل دستاویزات رکھنے والوں کو سفر کی اجازت نہیں دی جا سکتی۔ وزیر داخلہ نے واضح کیا کہ جو لوگ پاکستان کی بدنامی کا باعث بنیں گے اُن کے لیے جگہ جیل ہی ہے۔
ریجنل ڈائریکٹر ایف آئی اے لاہور علی ضیا اور ائیرپورٹ ڈپٹی ڈائریکٹر اویس بھی اس موقع پر موجود تھے۔
